పవన్ అభిమాని హత్య వెనుక కులం?

సంచలనం సృష్టించిన పవన్ కళ్యాణ్ అభిమాని వినోద్ రాయల్ హత్య విషయమై విస్తృత చర్చ జరుగుతోంది. అభిమాని హత్యపై వెంటనే స్పందించిన పవన్ కళ్యాణ్, వినోద్ తల్లిదండ్రులను పరామర్శించటమే కాకుండా దోషులను ఎవ్వరినీ వదిలి పెట్టేది లేదని భరోసా ఇచ్చారు. అంతేకాకుండా రెండు రోజులుగా తిరుపతిలోనే మకాం వేశారు. ఈరోజు ఓ బహిరంగ సభనూ నిర్వహించనున్నారు. అయితే ఈ సభ ద్వారా పవన్ తన అభిమానులకు భరోసా ఇవ్వనున్నారని నిర్వాహకులు చెప్తుండగా దీని వెనక రాజకీయ, సామాజిక కోణాలు కూడా ఉన్నాయని పలువురు విశ్లేషిస్తున్నారు.
వినోద్ రాయల్ హత్య కేవలం ఫ్యాన్స్ మధ్య జరిగిన గొడవ కాదనీ, ఇదో సామాజిక వర్గ పోరుగా తెలుస్తోంది. కర్ణాటక రాష్ట్రంలోని కోలార్ ఆంధ్రప్రదేశ్ రాష్ట్ర సరిహద్దు ప్రాంతంలో ఉంది. ఇక్కడ ఓ పెద్ద ఫ్యామిలీకి చెందిన హీరో సామాజిక వర్గానికి మరో పెద్ద హీరో సామాజిక వర్గానికి మధ్య చాలాకాలంగా కులం పోరు, వర్గ పోరు జరుగుతోంది. వినోద్ రాయల్ సామాజిక కార్యక్రమాలు చురుగ్గా నిర్వహిస్తుండటం తమను రెచ్చగొట్టడమే అని మరో సామాజిక వర్గం భావించినట్లు చెప్తున్నారు. ఇది తమ బలాన్ని స్థానికంగా, రాజకీయంగా దెబ్బతీసేదే అని భావించిన వారు చాలా పకడ్బందీగా హత్య చేయించారు. ఈనెల 21న రాత్రి నందిని డాబా వద్ద గొడవపడ్డ త్రినాథ్, సునీల్ లు పథకం ప్రకారం మరో వ్యక్తితో వినోద్ రాయల్ ను హత్య చేయించారని అంటున్నారు. పైగా ప్రధాన సూత్రధారులైన త్రినాథ్, సునీల్ లను పోలీసులు విడిచి పెట్టడం కూడా ఈ హత్య వెనక బాగా పలుకుబడి ఉన్నవారి హస్తం ఉందని, అందుకే నేరుగా పవన్ కళ్యాణ్ రంగంలోకి దిగినట్లు ప్రచారం జరుగుతోంది. అంతేకాకుండా ఈ విషయంలో తెలుగు దేశం నాయకులు పవన్ కళ్యాణ్ కు సహకరించకుండా ఈ వ్యవహారానికి దూరంగా ఉంటున్నారు. అందుకే పవన్ సైతం దోషులకు శిక్షపడక పోతే ఈ వ్యవహారం కేంద్రం వద్దకు తీసుకెళ్తానని హెచ్చరించారు. ఈరోజు పవన్ బహిరంగ సభలో ఏం మాట్లాడతారనేది ఆసక్తిగా మారింది.