గోడ కూలి నటుడు మనోజ్ కారు ధ్వంసం!

కొద్ది రోజులుగా హైదరాబాద్‌లో కురుస్తున్న భారీ వర్షాల వల్ల ప్రజలు తీవ్ర ఇబ్బందులకు గురయ్యారు. ఇప్పటికీ చాలా లోతట్టు ప్రాంతాల్లో నీరు నిలిచిపోవడంతో నానా అవస్థలు పడుతున్నారు. అయితే ఈ వర్షం సామాన్యులకే కాదు.. సెలబ్రిటీలకు సైతం చుక్కలు చూపించింది. సోమవారం రాత్రి కురిసిన భారీ వర్షానికి గచ్చిబౌలిలోని ఉర్దూ యూనివర్సిటీ రోడ్‌లో ఉన్న రీజినల్ టెలీకాం ట్రైనింగ్ సెంటర్ గోడ కూలిపోయింది. 10 అడుగుల గోడ ఒక్కసారిగా కూలిపోవడంతో ఐదు కార్లు ధ్వంసమయ్యాయి. వీటిలో ఓ తెలుగు యువ నటుడు కారు కూడా ఉండటం గమనార్హం.

ఛత్రపతి, అతడు సినిమాల్లో బాల నటుడిగా కనిపించిన మనోజ్ నంద‌న్ కారు పూర్తిగా ధ్వంస‌మైంది. ఈ మేరకు మనోజ్ తన ఫేస్‌బుక్ ఖాతా ద్వారా ఈ విషయాన్ని తెలియజేశాడు. ‘భారీ వర్షం కారణంగా గోడ కూలి కార్లు ధ్వంసమయ్యాయి. వాటిలో నా కారు కూడా ఉంది. అదృష్టవశాత్తు ఆ సమయంలో కార్లలో ఎవరూ లేరు’ అని మనోజ్ పోస్ట్ చేశాడు. ధ్వంసమైన తన కారు ఫొటోలను కూడా పోస్టులో ఉంచాడు.

‘సోమవారం రాత్రి 9 గంటల సమయం. నేను రోడ్డుకు అవతల ఉన్న కేఫ్ కాఫీ డేలో ఉన్నాను. నాతో పాటు నా ఫ్రెండ్స్ కూడా ఉన్నారు. కొంత సేపటి తరవాత బయటికొచ్చి కారు దగ్గరికి వెళ్తున్నాం. ఇంతలో పెద్ద శబ్దం.. పెద్ద గోడ కూలిపోయి నా కారు మీద పడింది. కారు మొత్తం డామేజ్ అయ్యింది’ అని మనోజ్ వాపోయాడు. కాగా, కూలిపోయిన గోడ శిథిలాలను మంగళవారం ఉదయం 11 గంటలకు జీహెచ్ఎంసీ సిబ్బంది తొలగించారు. అలాగే మిగిలిన గోడను కూడ కూల్చివేశారు.