రోడ్డు క్రాస్ చేసిన వ్యక్తి చెంప ఛెళ్లుమనిపించిన పోలీస్

రోడ్ క్రాస్ చేసిన ఓ వ్యక్తిని అక్కడే బందోబస్తులో వున్న ఓ పోలీస్ అధికారి పిలిచి మరీ చెంప ఛెళ్లుమనిపించిన సీన్ ఒకటి ఇప్పుడు ఇంటర్నెట్‌లో వైరల్ అవుతోంది. ముఖ్యమంత్రి కాన్వాయ్ అటువైపుగా వస్తున్న విషయాన్ని గ్రహించని ఆ వ్యక్తి అనుకోకుండా కాన్వాయ్ ముందు నుంచి రోడ్ క్రాస్ చేసుకుని వెళ్లడమే ఆ వ్యక్తి చేసిన తప్పిదం. కాన్వాయ్‌ ఇంకొద్ది దూరంలో వుందనగా ఆ వ్యక్తి రోడ్ క్రాస్ చేసుకుని వెళ్లడం గమనించిన పోలీసు అధికారి, కాన్వాయ్ వెళ్లిపోగానే అతడిని పిలిచిమరీ చెంప ఛెళ్లుమనిపించారు.

గురువారం ఉదయం 10 గంటల ప్రాంతంలో ఏపీ ముఖ్యమంత్రి చంద్రబాబు ప్రయాణిస్తున్న కాన్వాయ్ శంషాబాద్ విమానాశ్రయానికి వెళ్లే క్రమంలో ఈ ఘటన చోటుచేసుకున్నట్టు తెలుస్తోంది. తాను చేసిన తప్పిదం ఏంటో చెప్పకుండానే, మాటలతో మందలించకుండానే తనపై నేరుగా చేయి చేసుకున్న పోలీసు అధికారిని తిరిగి ఏం ప్రశ్నించాలో అర్థం కాని పరిస్థితుల్లో ఆ వ్యక్తి అక్కడి నుంచి వెళ్లిపోయినట్టు సమాచారం.