నేను ‘షి’ టీమ్ ఎస్సైని.. అయితే ఏంటి..?

అసభ్యకరమైన వీడియోలతో మహిళలను వేధిస్తున్న యువకుడ్ని దండిచాలని చూసిన ‘షి’ టీమ్ ఎస్సైకే వార్నింగ్ ఇచ్చిన ప్రబుద్ధుడిని హైదరాబాద్ సైబర్ క్రైమ్ పోలీసులు అరెస్టు చేశారు. పదో తరగతి వరకు చదివిన పశ్చిమ గోదావరి జిల్లా నందమూరు గ్రామానికి చెందిన మణిరత్నం ప్రస్తుతం పొలం పనులు చేసుకుంటున్నాడు. అతను గత కొంతకాలంగా పరిచయం లేని మహిళల నెంబర్లతో ఒక వాట్సాప్ గ్రూప్ క్రియేట్ చేసుకుని అందులో.. అశ్లీల వీడియోలను, ఫొటోలను షేర్ చేస్తున్నట్లు గుర్తించారు.

ఇటీవల ఓ బాధితురాలు ‘షి’ టీమ్‌కి ఫిర్యాదు చేయగా.. దర్యాప్తులో భాగంగా షి టీమ్ ఎస్సై శోభన్ బాబు నిందితుడికి ఫోన్ చేసి బుద్ధి చెప్పే ప్రయత్నం చేశారు. కానీ ఎస్సై మాటలని లెక్క చేయని మణిరత్నం.. అతనినే బెదిరించే ప్రయత్నం చేశాడు. దీంతో దర్యాప్తు కోసం ఎస్సై సైబర్ క్రైమ్ పోలీసుల సాయం కోరగా వారు నందమూరు వెళ్లి నిందితుడ్ని అరెస్టు చేశారు. అతని ఫోనులో దాదాపు 200పైగా మహిళల నెంబర్లు ఉన్నట్లు పోలీసులు గుర్తించారు.