చదివింది పదోతరగతి.. సంపాదన నెలకు రూ.2 లక్షలు

పదో తరగతి మాత్రమే చదువుకున్న అమ్మాయి నెలకు ఎంత సంపాదించగలదు? రూ. పదివేలు, మహా అయితే రూ. 20 వేలు కదూ. కానీ కర్ణాటకకు చెందిన నందిని అనే 33 ఏళ్ల మహిళ మాత్రం నెలకు అక్షరాలా రూ. 2 లక్షలు సంపాదిస్తోంది. ఓ పూజారి కూతురు.. పెద్దగా చదవుకోకపోయినా.. లక్షల్లో ఆర్జిస్తూ తనలాంటి వాళ్లకెందరికో ఆదర్శంగా నిలుస్తోంది. బెంగళూరు సమీపంలోని ఓ చిన్న పల్లెటూర్లో దిగువ మధ్యతరగతి కుటుంబంలో నందిని జన్మించింది. చిన్నప్పటి నుంచి చదువులో చురుకుగా ఉండే ఆమె డాక్టర్ కావాలని కోరుకునేది. కానీ ఆర్థిక పరిస్థితి కారణంగా పదో తరగతితోనే చదువుకు టాటా చెప్పేసి పెళ్లి పీటలు ఎక్కాల్సి వచ్చింది.

నందిని భర్త శ్రీకాంత శాస్త్రి కూడా ఆమె తండ్రిలాగే పూజారిగా పని చేసేవాడు. ఆయన సంపాదన కుటుంబ పోషణకే సరిపోయేది. సగటు ఇల్లాలిగా ఉండిపోవడాన్ని ఎంత మాత్రం ఇష్టపడని నందిని చిన్న చిన్న ఉద్యోగాలు చేస్తూ కుటుంబానికి ఆసరాగా నిలిచేది. భార్యభర్తల సంపాదనతో ఇల్లు గడిచేది. కానీ ఇంతలోనే ఆమె తండ్రి మరణించడంతో చెల్లెల్లి పెళ్లి బాధ్యతలు కూడా తనపైనే పడ్డాయి. దీంతో అప్పులు చేయాల్సి వచ్చింది. వీటి నుంచి బయటపడేందుకు ఏం చేయాలో ఆమెకు తోచలేదు.

Meet uberDOST Nandini, one of our top referrers. This is her story of overcoming debt: https://t.co/B9eDOEnwlI pic.twitter.com/dhvdYYy1zA — Uber India (@Uber_India) May 16, 2016
ఇలాంటి ఇబ్బందికర పరిస్థితుల్లో ఆమె బంధువులు ప్రముఖ క్యాబ్ సంస్థ ఉబర్ గురించి చెప్పారు. దీంతో ఆమె నగలన్నీ తాకట్టు పెట్టి టయోటా కారు కొనుగోలు చేసి ఉబర్‌లో నడపడం మొదలుపెట్టింది. 2015లో ఆమెకు ఉబెర్ దోస్త్ గురించి తెలిసింది. ఈ రిఫరల్ ప్రోగ్రాం ద్వారా.. ఎవరైనా తమకు తెలిసిన డ్రైవర్‌ను ఉబర్‌లో చేర్పించొచ్చు. అలా డ్రైవర్‌గా చేరి కొన్ని ట్రిప్పులు వేస్తే.. రిఫర్ చేసిన వాళ్లకు మూడు వేల రూపాయలను ఉబర్ అందిస్తుంది. అలా రిఫర్ చేసి నెలకు రూ.2 లక్షల దాకా సంపాదించే స్థాయికి నందిని ఎదిగింది.

ఇప్పటి వరకూ నందిని 600 మంది డ్రైవర్లను రిఫర్ చేసింది. ఇందుకోసం బెంగళూరులో ఓ చిన్న ఆఫీసు తెరిచి, నలుగురు సిబ్బందిని నియమించుకుంది. కష్టించి పనిచేస్తూ.. తన అప్పులను తీర్చేసింది. అంతే కాదు బెంగళూరులో ఓ ఇల్లు కూడా కట్టుకుంది. ఇప్పుడు ఆమె కూతురు ఇంటర్నేషనల్ స్కూళ్లో చదువుకుంటోంది. పేదరికం వల్ల తను డాక్టర్ కాలేకపోయినప్పటికీ.. తన కూతుర్ని మాత్రం డాక్టర్ని చేయడానికి సరిపడా డబ్బును ఆమె సంపాదిస్తోంది.