రెండు వేల నోటు సీక్రెట్ ఇదేనట

దేశంలో నల్ల ధనం కుప్పలు తెప్పలుగా పేరుకుపోవడానికి కారణం పెద్ద కరెన్సీ నోట్లేనని ఏపీ సీఎం చంద్రబాబు నాయుడు దగ్గర నుండి పలువురు ఆర్ధిక నిపుణుల వరకు ఎప్పటి నుండో తమ అభిప్రాయాన్ని చెపుతూ వస్తున్నారు. నల్ల ధనాన్ని నివారించేందుకు కృషి చేస్తున్నామంటున్న కేంద్రంలోని మోడి ప్రభుత్వం పెద్ద నోట్లను మూడు వారాల క్రితం రద్దు చేసిన సంగతి తెలిసిందే. ఆ నోట్లను రద్దు చేసిన తరువాత చిన్న నోట్లను చలామణీలోకి తెస్తుందనుకుంటే మళ్లీ రూ.2వేల నోటును విడుదల చేయడంతో దేశవాసులు అయోమయంలో పడ్డారు. ఒక పక్క పెద్ద నోట్లను వద్దు అని అంతా మొత్తుకుంటుంటే మోడీ ఏంటీ మళ్లీ రూ.2వేల నోటును తెచ్చారంటూ అంతా విస్మయం చెందారు.

దీని గురించి ఇటీవల తెలంగాణ సీఎం కేసీఆర్ తనదైన శైలిలో ఆసక్తికర వ్యాఖ్యలు చేశారు. ఈ నోటును తీసుకురావడం వెనుక కేంద్రానికి పక్కా వ్యూహమే ఉందని ఈ సందర్భంగా ఆయన విలేకరుల వద్ద వ్యాఖ్యానించారు. అది ఏమిటని మీడియా అడగగా దాన్ని వెల్లడించలేనంటూ బదులిచ్చారు. త్వరలోనే రూ.2వేల నోటును రద్దు చేయడం ఖాయమని మాత్రం ఆయన పరోక్షంగా చెప్పుకొచ్చారు. రద్దు చేసిన తరువాత కేంద్రం ఆ నోటును ఎందుకు చలామణీలోకి తెచ్చిందో అర్ధమవుతుందన్నారు. దీన్ని విన్న వారు, ఇటీవల మోడి హైదరాబాద్ పర్యటనకు వచ్చినప్పుడు రూ.2వేల నోటును ఎందుకు తేవాల్సి వచ్చిందనే దాని గురించి కేసీఆర్ తో షేర్ చేసుకుని ఉంటారని అనుకుంటున్నారు.