అలా వచ్చిన రూ.10నోట్లతో కారు కొన్నారు

పెద్దనోట్ల రద్దు అనంతరం చిల్లర దొరక్క చిరు వ్యాపారులు నానా తంటాలు పడుతుంటే...పేదలు పూట గడవక పస్తులతో ఉంటే..ఎరువులు కొనేందుకు కూడా నగదులేక రైతులు ఇబ్బందులు పడుతుంటే..ఉత్తర్ ప్రదేశ్ లోని సహరన్ పూర్ జిల్లా మలక్ పూర్ హుస్సేన్ అనే గ్రామానికి చెందిన నలుగు యువకులు మాత్రం ఎన్నడూ లేనివిధంగా దర్జా లైఫ్ లీడ్ చేస్తున్నారు. ఒక వైపు డబ్బురు లేక ఊరి జనం బ్యాంకులు, ఏటీఎంల చుట్టూ తిరుగుతుంటూ వీరు మాత్రం విందులు, వినోదాలంటూ తిరగడంతో ఊరి ప్రజలకు అనుమానం వచ్చింది. ఈ మధ్య కారు కూడా కొనడం వీరి అనుమానాలు మరింత రెట్టింపు అయ్యాయి.

దీంతో నజీర్, రాకేష్, అఫ్జల్, టిటు అనే యువకులపై పోలీసులకు ఫిర్యాదు చేశారు. కొన్నిరోజులు వీరిపై నిఘా పెట్టిన పోలీసులకు అసలు విషయం తెలిసింది.

నవంబర్ 19న స్థానిక స్టేట్ ఆఫ్ బ్యాంకులో మధ్యాహ్నానికే నగదు అయిపోయింది. దీంతో అప్పటి దాకా పడిగాపులుగాసిన జనం వట్టి చేతులతో తిరుగుముఖం పట్టారు. అయితే మధ్యాహ్నాం కల్లా నగదు అందుబాటులో ఉంచుతామని, వీలుకాకపోతే మరుసటి రోజు ఉదయం విత్ డ్రా చేసుకోవచ్చని అధికారులు జనానికి సర్దిచెప్పారు.

ఆ రోజు చీకటి పడే సమయానికి బ్యాంకుకు పెద్దమొత్తంలో నగదు చేరిందని గమనించిన ఈ నలుగురు యువకులు...అర్థరాత్రి బ్యాంకు తాళాలు బద్దలు గొట్టారు. అందుబాటులో ఉన్న రూ.10లక్షలు ఎత్తుకెళ్లారు. అందులో రూ.5లక్షలు రూ.10 నోట్లు కాగా, మిగతావి రూ.20నోట్లున్నాయి. బ్యాంకులో దోపిడి చేసిన తెల్లారే పాత కారును రూ.10నోట్లు పెట్టి కొన్నారు. మిగతా డబ్బుతో ఎంజాయ్ చేయడం మొదలుపెట్టారు.

బ్యాంకు దోపిడికి నాయకత్వం వహించిన నజీర్ ను అరెస్టు చేసి పోలీసులు..అతని నుంచి రూ.50వేల నగదు, కారును స్వాధీనం చేసుకున్నారు. మిగతావారి కోసం గాలింపు చర్యలు చేపట్టారు. యువకులు ఎత్తుకెళ్లిన నగదు మొత్తాన్ని స్వాధీనం చేసుకుంటామని పోలీసులు చెబుతున్నారు.