టపాసులు కాల్చేటప్పుడు కళ్లు జర భద్రం

సర్వేంద్రియానం... నయనం ప్రధానం అన్నారు. ఎంతో సంతోషంగా రంగురంగుల వెలుగులు జరుపుకోవాల్సిన దీపావళి పండుగ చిన్న చిన్న తప్పిదాలతో జీవితాన్నే చీకటిగా మార్చివేసే ప్రమాదముంది. టపాసులు కాల్చే సమయంలో అప్రమత్తంగా ఉండాలి. ముఖ్యంగా చిన్నపిల్లలు ఈ సమయంలో ప్రమాదాలకు గురవుతున్నారు. పటాకులు కాల్చే సమయంలో వారి దగ్గర పెద్దలు ఉండకపోవడం, సరైన మార్గదర్శకాలు లేకపోవడంతో ఇష్టానుసారంగా కాల్చుతారు. ఒక్కోసారి గాయాల పాలవుతారు. నిర్లక్ష్యం వల్ల చాలా మంది కళ్లు పోగొట్టుకున్న సందర్బాలు కూడా ఉన్నాయి.

ఏటా దీపావళి నాడు టపాసులు కాల్చేటప్పుడు నిర్లక్ష్యంగా వ్యవహరించి, గాయాలపాలై చూపు దెబ్బతిన్న బాధితులు పదుల సంఖ్యలో ఆస్పత్రుల్లో చేరుతుంటారు. ఈ అనుభవాలను దృష్టిలో పెట్టుకుని ఈ దీపావళి సమయంలో ప్రజలు జాగ్రత్తలు పాటించి ఆనందంగా పండుగను జరుపుకోవాలి. ఈ సందర్భంగా పాటించాల్సిన సూచనలు.

చైనా టపాసుల్లో ప్రమాదకరమైన రసాయనాలు ఉన్నట్లు వార్తలు వస్తున్నాయి. కాబట్టి వాటికి దూరంగా ఉండటం మంచిది.
నాణ్యమైన, గుర్తింపు గల కంపెనీలకు చెందిన పటాకులు మాత్రమే కొనుగోలు చేయాలి.
టపాసులు కాల్చేటప్పుడు పిల్లలను ఒంటరిగా వదలకండి. వారి వెంట పెద్దవారు తప్పనిసరిగా ఉండాలి.
బహిరంగ ప్రదేశాలు, మైదానాలు, ఖాళీ స్థలాల్లో మాత్రమే కాల్చాలి.
ముందుజాగ్రత్తగా కనీసం రెండు బక్కెట్ల నీటిని అందుబాటులో ఉంచుకోవాలి. పటాకులను కాల్చే సమయంలో కళ్లకు ప్రొటెక్టడ్ గ్లాసెస్‌ను పెట్టుకోవడం ఉత్తమం.

చిన్నచిన్న కాలిన గాయాలైతే వెంటనే వాటిని చల్లని నీటిని పోయాలి. శరీరానికి మంటలు అంటుకున్న సందర్భంలో శుభ్రమైన కాటన్ బెడ్‌షీట్ లేదా దుప్పటితో వాటిని ఆర్పివేసి వెంటనే దగ్గరలోని ఆస్పత్రికి తరలించాలి. ముఖానికి గాయాలైనప్పుడు ముఖ్యంగా దాని ప్రభావం ఎక్కువగా ఉంటుంది.