రోజుకు 40 సిగరెట్లు ఊదేసిన ఆ పిల్లాడు ఇప్పుడెలా ఉన్నాడో తెలుసా?

రోజుకు 40 సిగరెట్లను అలవోకగా ఊది పారేసిన రెండేళ్ల బాలుడికి సంబంధించిన వార్త మీకు గుర్తుందా? 2010లో ఈ వార్త తెగ వైరల్ అయ్యింది. ఇండోనేసియాకు చెందిన రెండేళ్ల అర్ది రిజల్ సిగరెట్లకు బానిసగా మారిన విషయం తెలుసుకొని ప్రపంచమంతా అప్పట్లో నోరెళ్లబెట్టింది. ఆ బాలుడు ఇప్పుడు ఎలా ఉన్నాడో తెలుసా? ఇండోనేసియా ప్రభుత్వ సహకారంతో సిగరెట్లు మానేసిన ఆ పిల్లాడి ఫొటోలు కూడా ఇప్పుడు నెట్లో వైరల్ అవుతున్నాయి. అర్ధి గురించి ప్రపంచమంతా తెలియడంతోపాటు.. చొరవ తీసుకోవాల్సిందిగా ఇండోనేసియా ప్రభుత్వాన్ని పలువురు కోరారు. దీంతో స్పందించిన ఆ దేశ ప్రభుత్వం 30 రోజుల ప్రోగ్రాంలో భాగంగా అర్ధితో పొగ తాగే అలవాటును మాన్పించింది.

సిగరెట్లు మానేయడంతో ఆ పిల్లాడిలో ఆకలి విపరీతంగా పెరిగింది. 2013లో సిగరెట్లు మానేసిన కొత్తలో వాళ్లమ్మను అర్ధి భలే తిప్పలు పెట్టేవాడట. సిగరెట్ తాగొద్దంటే.. బొమ్మలు కొనివ్వాలని డిమాండ్ చేసేవాడట. తలను గోడకేసి బాదుకుంటూ ఆపకుండా ఏడ్చేసేవాడట.

ఒక్కసారే సిగరెట్లు మాన్పకుండా ముందుగా అడిగినప్పుడు సిగరెట్ ఇచ్చిన అర్ధి తల్లి.. తర్వాత నెమ్మదిగా ఆ అలవాటును మాన్పించింది. దీంతో అతడు విపరీతంగా తినడం మొదలెట్టాడు. ఇంట్లో చాలా మంది ఉంటుండంతో.. అడిగినప్పుడల్లా అతడికి ఎవరో ఒకరు ఆహారం పెట్టేవారు.

ఇలా అతిగా తినడం వల్ల ఆరేళ్లు వచ్చే సరికి అర్ధి 80 కిలోల బరువు పెరిగాడు. తర్వాత చికిత్స చేయించుకోవడం, అవగాహన కార్యక్రమాల వల్ల ఇప్పుడు అతడు ఫిట్‌గా తయారయ్యాడు. ప్రస్తుతం తొమ్మిదేళ్ల వయసున్న అర్ధి ఇప్పుడు చాలా మంది దృష్టిని ఆకర్షిస్తున్నాడు. అతడెలా ఉన్నాడో మీరు కూడా చూసి చెప్పండి.