69 ఏళ్లపాటు లక్ష మందికి ఉచిత వైద్యం

అమ్మాయిలకు చదువులెందుకనే రోజుల్లోనే వైద్య వృత్తిని అభ్యసించిన ఓ మహిళ 69 ఏళ్లపాటు పేదలకు సేవలు అందించారు. మధ్యప్రదేశ్‌లో ఇండోర్‌లో తొలి డాక్టర్ అయిన డాక్టర్ భక్తి యాదవ్ గైనకాలజిస్ట్‌గా లక్ష మంది మహిళలకు ఉచితంగా వైద్యసేవలు అందించారు. రూపాయి కూడా తీసుకోకుండానే.. వేలాది మందికి పురుడు పోశారు. 91 ఏళ్లు వచ్చే దాకా ఆమె డాక్టర్‌గా బాధ్యతలు నిర్వర్తించడం గమనార్హం.

1926, ఏప్రిల్ 3న ఉజ్జయినీ జిల్లాలో జన్మించిన భక్తి యాదవ్‌ను అక్కడి వాళ్లంతా డాక్టర్ దాదీగా పిలుస్తారు. ఇండోర్‌లోని అఖిల ఆశ్రమ్‌లో పాఠశాల విద్యను అభ్యసించారు. మహాత్మా గాంధీ మెమోరియల్ కాలేజీ నుంచి 1948లో వైద్య విద్యను అభ్యసించారు. ఆమె ఇద్దరు కుమారులు డాక్టర్ చేతన్, డాక్టర్ రమన్ యాదవ్‌తోపాటు చేతన్ భార్య కూడా నర్సింగ్ హోం నిర్వహిస్తున్నారు.

భక్తి యాదవ్ ఉచితంగా వైద్యం అందిస్తుండటంతో.. మధ్యప్రదేశ్ ప్రజలే కాకుండా రాజస్థాన్, గుజరాత్‌లకు చెందిన పేదలు కూడా ఆమె దగ్గర చికిత్స పొందిన సందర్భాలున్నాయి. ఆమె చేసిన వైద్యసేవలకు గౌరవ సూచికగా కేంద్రం పద్మశ్రీతో సత్కరించింది. గత ఏడాది ఆగష్టులో ఆమె అనారోగ్యం కారణంగా తుది శ్వాస విడిచారు. భక్తి యాదవ్‌కు ఆమె భర్త చంద్ర సింగ్ యాదవ్ (లేట్) ఎంతో తోడ్పాటు అందించారు.

She has treated over 1 lakh patients free of cost as a gynaecologist in her 69 years of service. Salute the indomitable spirit of Dr Bhakti Yadav ji #DoctorDadi . pic.twitter.com/pYcQwwJYrl — VVS Laxman (@VVSLaxman281) January 3, 2018
భక్తి యాదవ్ సేవలను గుర్తు చేస్తూ.. మాజీ క్రికెటర్ వీవీఎస్ లక్ష్మణ్ ఆమె గురించి ట్వీట్ చేశారు. అకింత భావంతో ఎలాంటి లాభాపేక్ష లేకుండా సుదీర్ఘకాలంపాటు ఉచితంగా వైద్యసేవలు అందించిన డాక్టర్ దాదీకి సెల్యూట్ చేద్దాం..!!