శునకానికి మరణ శిక్ష!

ఓ చిన్నారిని తీవ్రంగా క‌రించింద‌న్న కార‌ణంతో లోకల్ కోర్టు కుక్కకు మ‌ర‌ణ‌ శిక్ష విధించిన ఘటన పాకిస్థాన్‌లో చోటు చేసుకుంది. పంజాబ్ ప్రావిన్స్‌ భ‌క్క‌ర్‌లోని కేల‌ర్ ప్రాంత అసిస్టెంట్ క‌మిష‌న‌ర్ రజా స‌లీమ్ ఈ శిక్ష విధించారు. మాన‌వ‌తా దృక్ప‌థంతో ఈ నిర్ణ‌యం తీసుకున్న‌ట్లు ఆయ‌న చెప్పారు. ‘ఆ చిన్నారిని కుక్క తీవ్రంగా గాయ‌ ప‌రిచింది. అందువల్ల దాన్ని చంపాల్సిందే’ అని స‌లీమ్ పేర్కొన్నారు. ఆ శునకం రిజిస్ట్రేష‌న్ వివ‌రాల గురించి తెలుసుకోవడానికి ఒక అధికారిని కూడా నియ‌మించారు. దాని యజమానిపై కేసు న‌మోదు చేయ‌నున్నారు.

ఆ శిక్ష‌ను స‌వాలు చేస్తూ సదరు శునకం య‌జ‌మాని అడిష‌న‌ల్ డిప్యూటీ క‌మిష‌న‌ర్‌కు అప్పీల్ చేశాడట. ‘ఆ చిన్నారి కుటుంబ స‌భ్యుల ఫిర్యాదు మేర‌కు నా కుక్కపై కేసు న‌మోదు చేశారు. వారం రోజుల పాటు జైలు శిక్ష కూడా అనుభ‌వించిన త‌ర్వాత మ‌ర‌ణ శిక్ష విధించ‌డం స‌రికాదు’ అని ఆ య‌జ‌మాని వాదిస్తున్నాడు.

ఈ శిక్ష ఇప్పుడప్పుడే అమలు కాదులేండి. దాని ప్రాణాల కోసం పోరాడుతూ.. ఆ యజమాని పాకిస్థాన్ సుప్రీంకోర్టు వరకూ వెళ్లవచ్చు. అక్కడ కూడా అనుకూల తీర్పు రాకపోతే క్షమాభిక్ష కోసం అప్పీల్ చేసుకోవచ్చు. అయితే దాని కోసం ఆ యజమాని కుక్కలా తిరగాల్సిందేనా.. అంటే వేచి చూడాలి మరి!