పెళ్లి చేసుకోవాలి.. పాస్ చేయండి సార్!

బీహార్, ఉత్తరప్రదేశ్ లాంటి రాష్ట్రాల్లో బోర్డ్ ఎగ్జామ్స్‌లో మాస్ కాపీయింగ్ ఏ రీతిన జరుగుతుందో మనందరికీ తెలిసిందే. అయితే, కాపీయింగ్ చేయలేని విద్యార్థులు.. ఎగ్జామినర్లను కాకా పట్టడానికి వింత వింత వేషాలు వేస్తారు. కొంత మందైతే ఏకంగా.. ఆన్సర్ షీటుకే రూ. 50, 100, 500 నోట్లను జత చేసి, వాటిని తీసుకొని పాస్ చేయాలని ప్రాధేయపడిన ఉదంతాలు కూడా ఉన్నాయి. కష్టపడి చదవకున్నా ఎలాగైనా పాస్‌ కావాలనే ఉద్దేశంతో.. ఏటా వేలాది మంది విద్యార్థులు ఇలాంటి వేషాలు వేస్తారని పేపర్లు దిద్దే టీచర్లే చెబుతున్నారు. కానీ, ఈ ఏడాది కఠిన నిబంధనలను అమల్లోకి తెచ్చారు. ‘ఇక మీదట ఇలాంటివారి ఆటలు సాగవు, చదువుకుంటేనే పాస్‌ అవుతారు, లంచం ఇవ్వజూపినా.. ఎలాంటి ప్రయోజనం ఉండదు’ అని అధికారులు స్పష్టం చేశారు.

ఇంతకుముందులా పరీక్షల్లో మాల్‌ ప్రాక్టీస్‌ జరగకుండా అధికారులు పటిష్ట చర్యలు తీసుకోవడంతో.. యూపీ బోర్డు ఎగ్జామ్స్‌‌కు హాజరైన ఓ విద్యార్థిని తనను పాస్ చేయాలంటూ వినూత్నంగా అభ్యర్థించింది. తాను వివాహానికి సిద్ధంగా ఉన్నానని, ఈ సమయంలో పరీక్షలో ఫెయిల్‌ అయితే చిన్నచూపు చూస్తారని.. అందువల్ల తనను పాస్ చేయాలని ఆ అమ్మాయి కోరింది.

‘సార్‌.. నేను ఓ అమ్మాయిని. జూన్‌ 28న నా పెళ్లి ఉంది. నేను ఫెయిల్‌ అయితే మా కుటుంబం చాలా బాధ పడుతుంది. నా పరిస్థితి అర్థం చేసుకొని, దయచేసి నన్ను పాస్‌ చేయండి’ అంటూ ఆమె సమాధాన పత్రంలో రాసుకొచ్చింది. మూల్యాంకనం చేస్తున్న ఉపాధ్యాయుడు దీన్ని ఉన్నాతాధికారుల దృష్టికి తీసుకెళ్లడంతో.. ఈ విషయం వెలుగులోకి వచ్చింది.