ఎక్మో జయకు ఫెయిలైనా..అతడికి ప్రాణం పోసింది

దివంగత నేత, అన్నాడీఎంకే అధ్యక్షురాలు జయలలితకు చివరి ఘడియల్లో అందించిన చికిత్సా విధానాన్నే బెంగళూరులో ఓ సాఫ్ట్‌వేర్ ఉద్యోగికి అందించి డాక్టర్లు ప్రాణం పోశారు. బెంగళూరుకు చెందిన 43 ఏళ్ల శ్రీనాథ్ అనే వ్యక్తి రెండు రోజులుగా తీవ్రమైన జ్వరంతో బాధపడుతూ హాస్పిటల్‌‌లో చేరాడు. అతడిని ఐసీయూకు తరలించి వైద్యులు చికిత్స అందజేశారు. ఇంతలోనే జ్వరానికి చికిత్స తీసుకుంటుండగా అతని గుండె పనిచేయడం అగిపోయింది.

శ్రీనాథ్‌కు గతంలో ఎలాంటి గుండె సంబంధ ఇబ్బందులు లేకపోయినా ఇలా జరగడంతో కుంటుంబ నిర్గాంతపోయింది. అతడి పరిస్థితిని గమనించిన డాక్టర్లు హృదయ కండరాల వాపుతో బాధపడుతున్నట్లు నిర్ధించారు. దీంతో శ్రీనాథ్‌కు ఎక్మో (ఎక్స్‌ట్రోకార్పొరియల్ మెంబరెన్స్ ఆక్సిజనేషన్) చికిత్స‌ను అందజేశారు. చెన్నైలోని అపోలో హాస్పిటల్‌ డాక్టర్లు కూడా గత వారం జయలలితకు ఈ చికిత్సను అందజేశారు.

దీని సహాయంతో రక్త ప్రసరణ పునరుద్దరించి, శరీరంలో కార్బన్‌డైయాక్సడ్‌ను బయటకు పంపుతారు.. ఎర్రరక్త కణాలకు ఆక్సిజన్‌ను అందించి, రక్తాన్ని గుండెకు సరఫరా చేస్తారు. ఎక్మో చికిత్స ప్రారంభించిన 24 గంటల తర్వాత శ్రీనాథ్ గుండె పనిచేయడం ప్రారంభించిందని వైద్యులు తెలిపారు.

అయితే ఈ చికిత్సపై భారతీయ వైద్యులకు అంతగా అవగాహన లేదు. ఆరోగ్య వంతులు గుండెపోటుకు గురైనపుడు ఈ చికిత్సా విధానాన్ని అవలంభించి ప్రాణాపాయం నుంచి రక్షించవచ్చని నారాయణ హృదయాలయ నిపుణుడు డాక్టర్ దేవి శెట్టి తెలిపారు. ఇప్పటి వరకు నారాయణ హృదయాలలో ఎక్మో ద్వారా 500 మందికి చికిత్సను అందించినట్లు తెలిపారు. ఇందులో శ్రీనాథ్ కూడా ఒకరని ఆయన అన్నారు.

ఈసీఎంఓ‌ను ప్రధానంగా రెండు క్లిష్టమైన పరిస్థితుల్లోనే ఉపయోగిస్తారని మణిపాల్ హాస్పిటల్ చైర్మన్ డాక్టర్ హెచ్ సుదర్శన్ బల్లాల్ తెలిపారు. వీటిలో ఒకటి గుండె పనిచేయడం నిలిచిపోవడం, రెండు న్యుమోనియా, ఇతర కారణాలతో ఊపరితిత్తులు చెడిపోతే దీన్ని అందజేస్తారు.