ఎక్కువ సయమం ఫేస్‌బుక్‌లో గడిపితే.....

రోజులో ఎక్కువ భాగం ఫేస్‌బుక్‌లో గడిపేవారికి ఇది ఓ హెచ్చరిక. అప్పుడప్పుడు ఫేస్‌బుక్ చూసేవారి కంటే నిరంతరం అందులో నిమగ్నమైన వారికి అనారోగ్యంతోపాటు విచారం తప్పదని తాజాగా జరిపిన పరిశోధనలో వెల్లడైంది. కాలిఫోర్నియా యూనివర్సిటీ, యేల్ యూనివర్సిటీకి చెందిన పరిశోధకులు చేపట్టిన పరిశోధనలో ఆసక్తికరమైన విషయాలు వెలుగుచూశాయి. మానసిక ఆరోగ్యం- ఫేస్‌బుక్ ప్రభావం అనే అంశంపై 2013 నుంచి 2015 మధ్య చేపట్టిన అధ్యయనంలో 5208 మంది పాల్గొన్నారు.

ఫేస్‌బుక్ వినియోగం పెరిగే కొద్ది వ్యక్తుల్లో సామాజిక, మానసిక, శారీరక ఆరోగ్యంపై తీవ్ర ప్రభావం చూపినట్లు పరిశోధనలో గుర్తించారు. అంతే కాకుండా సగటు కంటే ఎక్కువ పోస్టులు, ప్రొఫైల్స్ తరచూ మార్చే వారికి మానసిక ఆరోగ్య సమస్యలు ఎక్కువైనట్లు కూడా తేలింది. యూనివర్సిటీ ఆఫ్ కాలిఫోర్నియాకు చెందిన పబ్లిక్ హెల్త్ విభాగం అసిస్టెంట్ ప్రొఫెసర్ హోలీ సాఖ్య నేతృత్వంలోని జరిగిన ఈ అధ్యయనంలో యేల్ యూనివర్సిటీ హ్యూమన్ నేచర్ ల్యాబ్ డైరెక్టర్ నికోలస్ క్రిస్టికిస్ కూడా పాల్గొన్నారు. ఈ పరిశోధన ఫలితాలను అమెరికన్ జర్నల్ ఆఫ్ ఎపిడిమియాలజీలో ప్రచురించారు.