ఫలాహారి బాబావారి పాడు పని..

ఓ వైపు రేపిస్టు బాబాలు జైలు పాలవుతూనే ఉన్నా.. బాబాల ముసుగులో మహిళలపై అఘాయిత్యాలు జరుగుతూనే ఉన్నాయి. తాజాగా రాజస్థాన్‌లో పేరుమోసిన ఫలాహారి బాబాపై అత్యాచారం కేసు నమోదైంది. తన ఆశ్రమంలో.. 21 ఏళ్ల యువతిపై అతడు అకృత్యానికి పాల్పడినట్లు ఆరోపణలు వచ్చాయి. అయితే.. పోలీసులు ఈ విషయం గురించి ఫలాహారి బాబాను ప్రశ్నించే ప్రయత్నం చేయగా.. అతడు అప్పటికే హైబీపీతో ఆసుపత్రిలో చేరాడు.

కౌశలేంద్ర ఫలాహరి మహరాజ్‌ (70) రాజస్థాన్‌లో బాబాగా బాగా పాపులర్ అయ్యాడు. ఆహారంగా కేవలం పండ్లు మాత్రమే తీసుకోవడం వల్ల అనుచరులు ఇతడిని ఫలాహారి బాబాగా పిలుచుకుంటారు. న్యాయ విద్య అభ్యసిస్తున్న సదరు యువతి ఈ బాబా రికమెండేషన్‌తో ఓ కంపెనీలో ఇంటర్న్‌షిప్ అవకాశం పొందింది. తొలిసారిగా స్టైఫండ్ పొందిన ఆ యువతి బాబాకు ధన్యవాదాలు చెప్పి రూ.3000 ముట్టజెప్పుదామని అతడి ఆశ్రమానికి వెళ్లింది.

ఆగస్టు 7 సాయంత్రం బాబాను కలవడానికి వెళ్లిన తనను అతడి గదిలోకి తీసుకెళ్లి అత్యాచారానికి పాల్పడ్డాడని ఆమె ఫిర్యాదు చేసింది. జరిగిన విషయాన్ని ఎవరికైనా చెబితే చంపేస్తానని బెదిరించినట్లు బాధిత మహిళ ఫిర్యాదులో పేర్కొంది.

తొలుత బాబా బెదిరింపులకు భయపడి ఆ యువతి ఈ విషయాన్ని గోప్యంగా ఉంచింది. ఆ తర్వాత.. జరిగిన దారుణాన్ని తన తల్లిదండ్రులకు చెప్పుకొని కుమిలిపోయింది. ఇద్దరు సాధ్వీలపై అత్యాచారానికి పాల్పడ్డ కేసులో డేరా బాబా గుర్మీత్ రామ్ రహీమ్ సింగ్‌కు జైలు శిక్ష పడిన నేపథ్యంలో.. ఆ యువతి కుటుంబం ధైర్యం చేసుకొని సెప్టెంబర్ 11న బిలాస్‌పూర్ పోలీసులను ఆశ్రయించింది.

సదరు మహిళ ఇంటికి బాబా గతంలో కొన్నిసార్లు వెళ్లినట్లు పోలీసులు ప్రాథమిక విచారణలో గుర్తించారు. అతడు కోలుకున్న తర్వాత అదుపులోకి తీసుకొని విచారించనున్నట్లు వారు తెలిపారు.