కింద పులి, పైనుంచి వర్షం.. రాత్రంతా చెట్టు మీదే

పశ్చిమ బెంగాల్లోని సుందర్బన్ ప్రాంతం బెంగాల్ టైగర్లకు కేరాఫ్ అడ్రస్. అలాంటి భయంకరమైన పులులు సంచరించే ప్రాంతంలో రాత్రి పూటంతా అందులోనూ భారీ వర్షంలా ఉండాల్సి వస్తే? అది నిజంగా నరకమే కదూ..! బెంగాల్లోని తండ్రీకొడుకులకు సరిగ్గా ఇలాంటి అనుభవమే ఎదురైంది. ధోరాబగ్డా అనే గ్రామానికి చెందిన తండ్రీకొడుకులు మొహ్రం బైదా, అల్లాద్దీన్ బైదాలు కలిసి మంగళవారం ఉదయాన్నే సమీపంలోని మాట్లా నదిలో చేపల వేటకు వెళ్లారు. పగలంతా చేపలు పట్టిన వారు రాత్రి పూట ఇంటికి బయల్దేరారు. కానీ భారీ వర్షం కారణంగా నది ఉద్ధృతంగా ప్రవహిస్తోంది. ఆ ప్రవాహ వేగం ధాటికి వారు ప్రయాణిస్తున్న పడవ బోల్తాపడింది. నదిలో పడవ కొట్టుకుపోగా వారు మత్రం ఈదుకుంటూ క్షేమంగా ఒడ్డుకు చేరుకున్నారు. అమ్మా.. బతికిపోయాం రా బాబు అనుకునేలోగా వారికి పులి గాండ్రింపు వినిపించింది. దీంతో వారు పరుగుపరుగున వెళ్లి దగ్గర్లో ఉన్న ఓ పెద్ద చెట్టెక్కి కూర్చున్నారు. పై నుంచేమో కుండపోతలా వర్షం, కింద పులుల అరుపులు. ఈ భయంకర పరిస్థితిలో ఆ రాత్రంతా వారు బిక్కు బిక్కుమంటూ నిద్రలేకుండా గడిపారు. తెల్లవారాక వారిని వెతుక్కుంటూ వచ్చిన తోటి మత్స్యకారులు అక్కడికి చేరుకోవడంతో వారు ఊపిరి పీల్చుకున్నారు. వారి సాయంతో ఆ తండ్రీ కొడుకులు బతుకు జీవుడా అంటూ ఇల్లు చేరారు.