బాయ్‌ఫ్రెండ్‌తో మాట్లాడిందని కూతురినే షూట్ చేశాడు

కూతురు తమ పక్కింటి బాయ్‌ఫ్రెండ్‌తో మాట్లాడటం జీర్ణించుకోలేని తండ్రి, ఆ యువతి సోదరుడు ఆమెని తుపాకీతో కాల్చిన ఘటన ఇది. ఉత్తర్ ప్రదేశ్‌లోని సంబాల్ జిల్లా అస్మోలి గ్రామంలో శనివారం చోటుచేసుకున్న ఈ ఘటనలో తీవ్రంగా గాయపడిన యువతి ప్రస్తుతం చావుబతుకుల మధ్య కొట్టుమిట్టాడుతోంది.

తన కూతురు పక్కింటి అబ్బాయితో స్నేహం చేయడం ఇష్టం లేని తండ్రి, ఆ యువతి సోదరుడు ఆమెకి వార్నింగ్ ఇచ్చారు. అయినప్పటికీ యువతి అతడితోనే ఫోన్‌లో మాట్లాడుతుండటం గమనించిన తండ్రీ, కొడుకులు ఆగ్రహంతో ఆమెపై దాడికి పాల్పడి తుపాకీతో కాల్చారు. తుపాకీ కాల్పుల శబ్ధంతో ఘటనా స్థలానికి వచ్చిన స్థానికులు జరిగిన ఘటనపై పోలీసులకి సమాచారం అందించారు. కేసు నమోదు చేసుకున్న పోలీసులు దర్యాప్తు మొదలుపెట్టారు. ఆస్పత్రిలో చికిత్స పొందుతున్న బాధితురాలి వద్ద నుంచి ఘటన జరిగిన తీరుతెన్నులపై వాంగ్మూలం సేకరించినట్టు తెలిపారు కేసు దర్యాప్తు చేస్తున్న పోలీసులు.