సీఎంను తిట్టినా.. ఫేస్‌బుక్ సహకరించట్లేదు!

తెలంగాణ సీఎం కేసీఆర్‌ను దూషిస్తూ ఫేస్‌బుక్‌లో కామెంట్లు పెట్టిన వ్యక్తికి సంబంధించిన ఐపీ అడ్రస్ ఇచ్చేందుకు ఫేస్‌బుక్ సంస్థ నిరాకరించింది. దీంతో హైదరాబాద్ సీసీఎస్ సైబర్ క్రైమ్ అధికారులు సమచారం కోసం ఇంటర్‌పోల్‌కు లేఖ రాశారు. సీఎంను దూషిస్తూ.. రామకృష్ణ అనే వ్యక్తి ఫేస్‌బుక్‌లో వీడియోను పోస్ట్ చేశాడు. దీంతో నవంబర్ 13న చాదర్‌ఘట్ పోలీస్ స్టేషన్లో కేసు నమోదైంది. తర్వాత అతడి ఫేస్‌బుక్ ఐడీకి సంబంధించి తాజాగా సైబర్ క్రైమ్ విభాగం మరో కేసు రిజిస్టర్ చేసింది.

విదేశాల నుంచి ఫేస్‌బుక్ ద్వారా దూషణకు దిగిన వ్యక్తుల ఐపీ అడ్రస్ ఇవ్వడానికి సదరు సోషల్ మీడియా సంస్థ నిరాకరిస్తోంది. నిందితుడి లాగిన్, లాగౌట్ ఐపీ వివరాల్ని ఫేస్‌బుక్ ఇవ్వకపోతే వారిని గుర్తించడం కష్టంగా మారుతోంది. ఫేస్‌బుక్ సహాయ నిరాకరణతో ఇలాంటి 17 కేసులను సైబర్ క్రైమ్ పోలీసులు మూసేయాల్సిన పరిస్థితి తలెత్తింది. వ్యక్తిగత దూషణతోపాటు మతపరమైన సున్నితమైన అంశాలపై మనోభావాలు దెబ్బతినేలా కామెంట్లు చేస్తున్న వారి ఐపీ అడ్రస్‌లను ఫేస్‌బుక్ పోలీసులతో పంచుకోవడం లేదు.

ఫేస్‌బుక్ ఐపీ అడ్రస్ ఇవ్వకపోయినప్పటికీ.. ట్రాకర్ సాఫ్ట్‌వేర్ ద్వారా ఈమెయిల్స్, మెసేజ్‌లను ఉపయోగించి నిందితుల్ని గుర్తించొచ్చు. కానీ వీటిని న్యాయస్థానం సాక్ష్యంగా గుర్తించకపోవడం సమస్యగా మారింది. దీంతో కేసు ముందుకు వెళ్లాంటే ఫేస్‌బుక్ ఇచ్చే అధికారిక నివేదిక కీలకంగా మారిందని అధికారులు చెబుతున్నారు. లైంగిక వేధింపులు, మహిళలను వేధింపులకు గురి చేస్తోన్న కేసుల్లో మాత్రం ఫేస్‌బుక్ నిందితుల ఐపీ అడ్రస్‌లను పోలీసులకు ఇస్తోంది.