ట్రాఫిక్ సిగ్నల్స్‌ దీపాల్లో మహిళ చిత్రం!

లింగ వివక్షతపై ప్రపంచవ్యాప్తంగా ఉద్యమాలు కొనసాగుతూనే ఉన్నాయి. ప్రపంచంలోని ఒక్కోదేశంలో ఒక్కోరకమైన డిమాండ్‌‌ను మహిళ ఉద్యమకారులు వినిపిస్తూనే ఉన్నారు. లింగ వివక్షతను రూపుమాపి, ప్రజల్లో లింగ సమానత్వంపై అవగాహన కల్పించడానికి అనేక ప్రయత్నాలు చేస్తునే ఉన్నారు. అయితే ఆస్ట్రేలియాలో మాత్రం విభిన్నంగా లింగసమానత్వంపై అవగాహన కల్పించడానికి అక్కడ ప్రభుత్వం కృషి చేస్తోంది.

రహదారులపై ఉండే ట్రాఫిక్‌ సిగ్నల్స్‌లో ఆమె చిత్రాన్ని పొందుపర్చారు. పాదచారులు రోడ్డు దాటేటప్పుడు వెలిగే లైట్లలో ఇకపై స్త్రీ ప్రతిబింబం దర్శనమివ్వనుంది. గతంలో కేవలం పురుషుల చిత్రాలతో కూడిన ఎరుపు, ఆకుపచ్చ రంగు లైట్లు మాత్రమే ఉండేవి. దీన్ని సవాల్ చేస్తూ ఆస్ట్రేలియాకు చెందిన 120 ఉద్యమ సంస్థలు పోరాటానికి దిగాయి.

కేవలం పురుషుల చిత్రాలను మాత్రమే కూడళ్లలోని లైట్లలో వినియోగంచడం లింగవివక్ష కిందకే వస్తుందని, లింగ సమానత్వాన్ని చాటిచెప్పేందుకు మహిళల చిత్రాన్ని కూడా ప్రదర్శించాలని డిమాండ్‌ చేశాయి. ఈ పోరాటానికి విక్టోరియా రాష్ట్ర గవర్నర్‌ లిండా నేతృత్వం వహించారు. దీంతో మెల్‌బోర్న్‌ నగరపాలక సంస్థ ట్రాఫిక్ కూడళ్లలోని సిగ్నల్ లైట్స్‌లో స్త్రీ ప్రతిబింబాన్ని ఉంచాలని నిర్ణయం తీసుకుంది. ఏడాదిపాటు ప్రయోగాత్మకంగా పరిశీలించిన తర్వాతే నగరవ్యాప్తంగా అన్ని కూడళ్లవద్ద సిగ్నల్స్‌లో మార్పులు చేశారు.