వికటించిన విందు... 15 మంది మృతి

వివాహంలో వడ్డించిన విందు వికటించడంతో నాలుగు రోజుల్లోనే 15 మంది మృత్యువాత పడ్డారు. ఈ ఘటన తూర్పు గోదావరి జిల్లా వై.రామవరం మండలంలోని చాపరాయిలో విందు భోజనం వికటించి 15 మంది మృతి చెందారు. మరో 20 మంది అస్వస్థతకు గురైనట్లు అధికారులు తెలిపారు. నాలుగు రోజుల వ్యవధిలో 15 మంది మృతి చెందినట్లు పేర్కొన్నారు. ఓ వివాహ వేడుకలో వడ్డించిన మాసాంహారం వికటించి విషంగా మారడంతోనే ఈ ఘటన చోటుచేసుకున్నట్లు తెలియజేశారు. అస్వస్థతకు గురైనవారిని రంపచోడవరం ఏరియా ఆస్పత్రికి తరలించారు. దీనిపై పూర్తిస్థాయి విచారణకు కలెక్టర్ కార్తికేయ మిత్రా ఆదేశించారు. నాలుగు రోజుల్లోనే 15 మరణాలు సంభవించినా ఎలాంటి సమాచారం లేకపోవడం గమనార్హం. ఆ ప్రాంతానికి వైద్యుల బృందాన్ని పంపినట్లు కలెక్టర్ వెల్లడించారు.

ఇది మారుమూల గిరిజన ప్రాంతం కావడంతో వారికి సరైన వైద్య సదుపాయాలు అందకపోవడమే మరణాలకు దారితీసింది. గిరిజనుల అభివృద్ధికి అనేక సంక్షేమ కార్యక్రమాలను అమలు చేస్తున్నట్లు చెప్పుకునే ప్రభుత్వాలను వాటి అమలులో మాత్రం నిర్లక్ష్యంగా వ్యవహరిస్తున్నాయి. దీనికి అధికారుల అలసత్వం కూడా ఓ కారణం. అధునాతన సాంకేతిక పరిఙ్ఞానం అందుబాటులోకి వచ్చినా మారుమూల ప్రాంతాల అభివృద్ధి మాత్రం శూన్యం. మరణించిన వారిలో చిన్నపిల్లలు కూడా ఉన్నట్లు సమాచారం. అయితే ఈ మరణాలపై పూర్తిస్థాయి సమాచారం మాత్రం అందుబాటులోకి రాలేదు.