ఒకేసారి 5 ఉద్యోగాలకు ఎంపికైన యువతి

ప్రస్తుత పోటీ ప్రపంచంలో ఒక్క ఉద్యోగం సాధించాలంటేనే చాలా కష్టం. కానీ, ఏపీలోని కృష్ణాజిల్లాకు చెందిన ఓ యువతి.. ఏకంగా 5 ఉద్యోగాలకు ఎంపికై సత్తా చాటింది. కాంపిటీటివ్ పరీక్షల్లో ఒక్క ఉద్యోగం సంపాదించడమే కష్టతరమైన తరుణంలో.. ఒకేసారి అన్ని జాబ్‌లకు ఎంపికైన ఆ యువతిని ఇప్పుడు ప్రశంసల్లో ముంచెత్తుతున్నారు. పి. తేజస్వి అనే యువతి గత వారం రోజుల వ్యవధిలో.. న్యూ ఇండియా ఎస్యూరెన్స్‌ కంపెనీ లిమిటెడ్‌లో ఆపరేషనల్ ఆఫీసర్‌, యూనియన్‌ బ్యాంకు ఆఫ్‌ ఇండియాలో మార్కెటింగ్‌ స్పెషలిస్ట్‌ ఆఫీసర్‌, కెనరా బ్యాంకులో ప్రొబేషనరీ ఆఫీసర్‌, సిండికేట్‌ బ్యాంకులో క్లర్క్‌, ఏపీ కో-ఆపరేటివ్‌ బ్యాంకులో క్లర్క్‌ ఉద్యోగాలను సాధించింది. ఆమె తండ్రి స్కూల్ హెడ్‌మాస్టర్‌గా పని చేస్తుండగా, తల్లి గృహిణిగా ఉన్నారు.

పేరుకు తగ్గట్టే రాణిస్తున్న.. తేజస్వి బీఎడ్‌ తర్వాత ఎంబీఏ చేసింది. గతేడాది వ్యవసాయ శాఖలో ఎంపీఈవోగా ఉద్యోగం సాధించి చాట్రాయి మండలంలో పనిచేసింది. పోటీ పరీక్షలకు ప్రిపేరవడం కుదరకపోవడంతో.. ఆర్నెళ్ల కిందట ఆ ఉద్యోగానికి రాజీనామా చేసింది. ఇటీవల ఆమె.. సెంట్రల్‌ వేర్‌ కార్పొరేషన్‌లో మేనేజర్‌ ఉద్యోగం కోసం డిల్లీలో ఇంటర్వ్యూకు హాజరైందట. అందులోనూ విజేతగా నిలుస్తానని ఆత్మవిశ్వాసంతో చెబుతోంది.

ఒకేసారి ఇన్ని ఉద్యోగావకాశాలు వచ్చి సందిగ్ధంలో పడేశాయి అంటున్న తేజస్వి చివరగా.. న్యూ ఇండియా ఎస్యూరెన్స్‌ కంపెనీలో ఆపరేషనల్ ఆఫీసర్‌గా చేరాలని నిర్ణయం తీసుకున్నట్లు మీడియాకు తెలిపింది. బీటెక్‌ పూర్తి చేసిన ఆమె తమ్ముడు కూడా అక్క ఇచ్చిన స్ఫూర్తితో పోటీ పరీక్షలకు సన్నద్ధమవుతుండటం గమనార్హం. సివిల్స్‌లో విజేతగా నిలవాలన్నదే అంతిమ లక్ష్యమని, ఆ దిశగా ప్రయత్నం చేస్తున్నానని చెబుతున్న తేజస్వి కఠోర శ్రమకు ఎలాంటివారైనా హ్యాట్సాప్ చెప్పాల్సిందే కదా!