గాంధీ ఆసుపత్రి తీరు మారదా?!

వందల కోట్ల రూపాయిలు పెట్టి ప్రభుత్వాసుపత్రుల్లో ఎన్ని సౌకర్యాలను కల్పించి మార్పుతేవాలని ప్రయత్నించే ప్రభుత్వాలకు ఆసుపత్రుల సిబ్బందిలో వేళ్లూనుకుపోయిన అలసత్వాన్ని తొలగించడం మాత్రం సాధ్యం కావడం లేదు. తెలుగు రాష్ట్రాల్లో ప్రతీ రోజు ఏదో ఒక ప్రభుత్వాసుపత్రిలో వైద్య సిబ్బంది నిర్లక్ష్యం బయటపడుతూనే ఉంది.

తాజాగా హైదరాబాదులోని ప్రఖ్యాత గాంధీ ఆసుపత్రిలో వైద్య సిబ్బంది నిర్లక్ష్యం తారస్థాయికి చేరిన సంగతి వెలుగుచూసింది. జనగామ మండలానికి చెందిన మూడేళ్ల చిన్నారి న్యూరోడీజనరేటివ్ అనే వైద్య సమస్యతో బాధపడుతూ ఆసుపత్రిలో మూడు నెలల చికిత్స పొంది ఇంటికి వెళ్లింది. మళ్లీ అనారోగ్యం కలగడంతో ఆమెను తల్లితండ్రులు ఆసుపత్రిలో చేర్చారు. చికిత్సలో భాగంగా వైద్యుడు ఆ బిడ్డకు ఐవీ ఫ్లూయిడ్ రాసారు. ఆ ప్రిస్కిప్షన్ ప్రకారం సెలైన్ ఎక్కించే క్రమంలో సిబ్బంది చేతికి పురుగు అవశేషం ఉన్న కలుషితమైన సెలైన్ సీసా చేతికి రాగా దాన్ని అలాగే ఆ బిడ్డ శరీరంలోకి ఎక్కించేసారు. దాంతో ఆమె ఆరోగ్యం మరింత విషమించింది.

చిన్నారికి ఊపిరి తీసుకోవడం కష్టంగా మారింది. శరీరం అంతా ఎర్రటి దద్దుర్లు వచ్చాయి. దీంతో ఆమె తండ్రి కంగారుపడుతూ వైద్యుల దృష్టికి తీసుకెళ్లగా వారు పీడియాట్రిక్ ఇంటెన్సివ్ కేర్ యూనిట్ కు తరలించి అత్యవసర చికిత్స ప్రారంభించారు.

నిరుపేదలకు మెరుగైన చికిత్స అందచేయాలనే ఉద్దేశంతో ప్రభుత్వం ఆరోగ్య శ్రీ పథకాన్ని ప్రారంభించి ప్రైవేట్ ఆసుపత్రుల ద్వారా చికిత్స ప్రారంబించినపుడు ప్రభుత్వాసుపత్రుల సిబ్బంది నానా యాగీ చేశారు. ప్రభుత్వాసుపత్రులను ప్రభుత్వం నిర్లక్ష్యం చేస్తోందని, ప్రైవేటు ఆసుపత్రులను ప్రోత్సహిస్తోందంటూ ఆందోళనలు చేశారు. కానీ, తమ నిర్లక్ష్యంలో మార్పుతెచ్చుకోకుండా ప్రజల ప్రాణాలతో బంతాట ఆడుకోవడాన్ని ప్రభుత్వాసుపత్రుల సిబ్బంది మానుకోనంత వరకు ఆరోగ్య శ్రీ లాంటి స్కీములు ఎన్ని అమలు చేసినా నో యూజ్ అని ప్రజలు అంటున్నారు.