ఆ తెగలో పేర్ల పద్ధతి ఎంత విడ్డూరమో..!

మోదీ, రివాల్వర్, హైకోర్టు, హెయిర్ పిన్, డబ్బా, చెయిన్, హోటెల్, టీ, కాఫీ, చాకోలెట్, రాత్ రాణి, కాత్రానీ.. ఇవన్నీ మనుషుల పేర్లంటే నమ్ముతారా..! అవును.. కర్ణాటకలోని శిమోగా జిల్లాలో కనిపించే ‘హక్కీ పిక్కీ’ గిరిజన తెగకు చెందిన వారి పేర్లివి. ఈ తెగలో పేర్లు పెట్టుకోడానికి ఓ పద్ధతంటూ ఏదీ లేదట. అందుకే శిశువు జన్మించినప్పుడు.. ఆ సమయంలో వారికి ఏం తోస్తే ఆ పేరే పెట్టేస్తారట. ఈ నామకరణ విధానం పట్ల వాళ్లు చాలా ఆనందం వ్యక్తం చేస్తున్నారు. ‘నేను పుట్టిన వార్త చెవిన పడే సమయానికి.. నా తండ్రి హై కోర్టు దగ్గర భిక్షాటన చేస్తున్నాడట. వెంటనే నా పేరు హై కోర్టుగా ఖాయం చేశాడు’ అని ఆనందంగా చెబుతోంది ఓ బాలిక.

హక్కీ పిక్కీ తెగకు చెందిన ప్రజలు భారత పౌరులే అయినా.. అధికారికంగా వీరికి ఎలాంటి గుర్తింపూ లేదు. ఆధార్ కార్డు, ఓటర్ ఐడీ కార్డులకు వీళ్లు చాలా దూరంగా ఉన్నారు. సుమారు 270 కుటుంబాలకు చెందిన 500 మంది జనాభా ఉన్న ఈ తెగ కటిక పేదరికంతో బతుకీడుస్తోంది. పాఠశాలలు తదితరాలకు దూరంగా ఉన్న ఈ తెగను నిరక్షరాస్యత పట్టి పీడిస్తోంది.

సాధారణంగా ఈ తెగ వారు కూలీ లేదా భిక్షాటనపై ఆధారపడి పొట్ట పోసుకుంటున్నారు. ఎన్ని కష్టాలెదురైనా.. నిజాయతీ వీడకపోవడం ఈ తెగ ప్రత్యేకత. అభివృద్ధికి ఆమడ దూరంలో ఉన్న ఈ ప్రజలు మెరుగైన జీవితం కోసం కలలు కంటున్నారు. మౌలిక వసతులు కల్పించాలని ప్రభుత్వాన్ని డిమాండ్ చేస్తున్నారు.
Read this in Kannada