అయ్యా సీఎం గారు.. దయతో నన్ను చంపించండి!

'నేనొక దళిత అమ్మాయిని. నాపై మే 2న గ్యాంగ్‌ రేప్‌ జరిగింది. పోలీసులు కేసు నమోదు చేసినా.. ఈ రోజు వరకూ వాళ్లపై ఎలాంటి చర్యా తీసుకోలేదు. నాపై దారుణానికి ఒడిగట్టిన వాళ్లు నా కళ్ల ముందే తిరుగుతుంటే ఒక్కో క్షణం నరకం అనుభవిస్తున్నా. దయచేసి నాకు న్యాయం చేయండి లేదా మెర్సీ కిల్లింగ్ (కారుణ్య మరణం)కు అనుమతివ్వండి'.. ఓ రేప్ బాధితురాలు సాక్షాత్తూ రాష్ట్ర ముఖ్యమంత్రికి పెట్టుకున్న గోడు సారాంశం ఇది. ఉత్తరప్రదేశ్ సీఎం యోగి ఆదిత్యనాథ్‌ను ఉద్దేశించి ఓ అత్యాచార బాధితరాలు చేసిన ట్వీట్‌ ఆ రాష్ట్రంలో సంచనలంగా మారింది. రాష్ట్రంలో శాంతి భద్రతలు కరువయ్యాయంటూ ప్రతిపక్షాలు మండిపడుతున్నాయి.

యూపీ సీఎంకు రేప్‌ బాధితురాలు చేసిన ట్వీట్‌ ఇప్పుడు సోషల్‌ మీడియాలో వైరల్‌గా మారింది. ఆగ్రాకు చెందిన ఆ యువతి ట్వీట్‌తో పాటు.. పోలీసులకు, జాతీయ ఎస్సీ/ఎస్టీ కమిషన్‌కు చేసిన ఫిర్యాదు పత్రాలను కూడా జత చేసింది. సీఎంకు పంపిన ట్వీట్‌లో ఆ రాష్ట్ర డీజీపీ సుల్ఖాన్ సింగ్‌, ఆగ్రా పోలీసులను ట్యాగ్ చేసింది.

ప్రభుత్వం ఎన్ని చర్యలు తీసుకుంటున్నా.. ఆ రాష్ట్రంలో అత్యాచారాలు ఆగడం లేదు. తాజాగా ట్వీట్ చేసిన యువతి మనోవేదన పలువురిని కలచివేస్తోంది.