తొలి ట్రాన్స్‌జెండర్ కానిస్టేబుల్‌‌‌గా గంగా కుమారి

రాజస్థాన్‌లో తొలిసారిగా ఓ ట్రాన్స్‌జెండర్‌కు పోలీసు ఉద్యోగం దక్కింది. ఆ రాష్ట్రంలో తొలి ట్రాన్స్‌జెండర్ మహిళా కానిస్టేబుల్‌‌గా గంగా కుమారి గుర్తింపు పొందారు. జోలోర్ జిల్లా రాణివరాకి చెందిన గంగా కుమారి 2013 కానిస్టేబుల్ పరీక్షల్లో సెలెక్ట్ అయ్యారు. అయితే.. వైద్య పరీక్షల్లో ఆమె ట్రాన్స్‌జెండర్ అని తేలడంతో ఉద్యోగ నియామకానికి సంబంధించిన అపాయింట్‌మెంట్ నిలిపేశారు. దీంతో పరీక్షల్లో అర్హత సాధించినప్పటికీ.. జోలోర్ ఎస్పీ తనకు అపాయింట్‌మెంట్ ఇవ్వడం లేదంటూ గంగా కుమారి హైకోర్టును ఆశ్రయించారు.

ఈ కేసుపై విచారణ చేపట్టిన హైకోర్టు ధర్మాసనం.. గంగా కుమారిని 6 వారాల్లోగా కానిస్టేబుల్‌గా నియమించాలంటూ సోమవారం (నవంబర్ 13) ఆదేశాలు జారీ చేసింది. కోర్టు మార్గదర్శకాల నేపథ్యంలో పోలీసు అధికారులు తక్షణమే ఆ నియామకం చేపట్టారు. రాజస్థాన్‌లో ఓ ట్రాన్స్‌జెండర్‌ మహిళకు ప్రభుత్వ ఉద్యోగం ఇవ్వడం ఇదే తొలిసారి కాగా.. దేశంలో ఇలాంటి నియామకం మూడోది కావడం విశేషం.