ఆకాశం నుంచి బంగారు కడ్డీల వర్షం!

ఆకాశం నుంచి బంగారం వర్షం కురిస్తే ఎలా ఉంటుంది? ఊహించుకుంటేనే.. ‘అబ్బా’ అనిపిస్తుంది కదూ. అలాంటి ఘటనే రష్యాలో చోటుచేసుకుంది. యకుస్క్‌ విమానాశ్రయం నుంచి గురువారం బంగారం లోడ్‌తో క్రస్నోయాస్క్‌కు వెళ్తున్న నింబస్ ఎయిర్‌లైన్ వారి ఆన్-12 విమానం టేకాఫ్ కాగానే డోరు తెరుచుకుంది. దీంతో.. అందులో ఉన్న బంగారు కడ్డీలన్నీ వర్షంలా కురిశాయి.

విమానంలో 9.4 టన్నుల బంగారం ఉండగా.. దాదాపు 3 టన్నులకు పైగా బంగారు కడ్డీలు రన్‌వేపై పడిపోయాయి. దీంతో అప్రమత్తమైన విమానాశ్రయం సిబ్బంది.. హుటాహుటిన వాటిని సేకరించారు. ఇలా 172 బంగారు కడ్డీలను గుర్తించారు. అయితే, ఈ కడ్డీలు రన్‌వేపైనే పడటం వల్ల అధికారులు ఊపిరి పీల్చుకున్నారు. జనావాసాల్లో పడినా, లేదా విమానంలోని లోడ్ అంతా జారిపోయినా తిరిగి దక్కడం కష్టమే. అంతేకాదు, లోడ్ మీదపడితే ప్రాణ నష్టం కూడా జరిగేది.

విమానం డోర్ హ్యాండిల్ చెడిపోవడం వల్ల ఈ ప్రమాదం చోటు చేసుకుందని అధికారులు వివరణ ఇచ్చారు. ఈ ఘటనపై ఉన్నతాధికారులు విచారణ చేపట్టారు. అయితే, రన్‌వేపై చెల్లాచెదురుగా పడివున్న బంగారు కడ్డీల ఫొటోలు సోషల్ మీడియాలో వైరల్‌గా షేరవ్వుతున్నాయి. అలాంటి బంగారు వాన.. మన ఇళ్లపై కూడా కురిస్తే ఎంత బాగుంటుందో కదూ అంటూ నెటిజన్ మిత్రులు ఫీలవ్వుతున్నారు.