కట్నం కోసం వేధిస్తే... ఇలాగే బుద్ధి చెప్పాలి

వరకట్నం అడిగిన వరుడికి భలే షాకిచ్చారు అమ్మాయి తల్లిదండ్రులు. దెబ్బకి దెయ్యం దిగొచ్చింది వరుడికి. అసలేం జరిగిందంటే... హర్యానాలోని పల్వల్ నగరంలో ఫరీద్ ఖురేషి అనే యువకుడు కుటుంబంతో నివసిస్తున్నాడు. అతనికి స్థానికంగా ఉండే యువతితోనే పెళ్లి జరిగింది. వధువును అత్తవారింటికి తీసుకెళ్లేందుకు వరుడు, అతని సోదరులు, మరో ఇద్దరు వచ్చారు. ఇంకా భార్యని కాపురానికి తీసుకెళ్లక ముందే తనకు అదనంగా కట్నం కావాలని అడిగాడు. ఇవ్వలేమని చెప్పిన వధువు కుటుంబాన్ని దూషించాడు. కోపం వచ్చిన అమ్మాయి తల్లిదండ్రులు, కుటుంబసభ్యులు వరుడితో పాటూ వచ్చిన వారందరినీ గదిలో పెట్టి తాళమేశారు. అనంతరం గ్రామపెద్దల దృష్టికి విషయాన్ని తీసుకెళ్లారు.

పంచాయతీ పెద్దలు వధువు పేరు మీద నాలుగు బిఘాల భూమిని రాయాలని ఆదేశించారు. లేదా ఆమె పేరును పదిలక్షల రూపాయలు ఫిక్స్ డ్ డిపాజిట్ వేయాలని చెప్పారు. అలా అయితేనే అమ్మాయి అత్తవారింటికి వస్తుందని లేకుంటే కాపురానికి రాదని తేల్చి చెప్పారు. వరుడికి దిమ్మదిరిగింది. కాసుల కోసం కక్కుర్తి పడి అదనపు కట్నం అడిగితే... ఇలా బుక్కయి పోయానేంట్రా అనుకున్నాడు. పోలీసులు విషయం తెలిసినా ఎవరూ ఫిర్యాదు చేయకపోవడంతో వారు కలగజేసుకోలేదు. ఇంకా వధువు, వరుడి కుటుంబాల మధ్య, గ్రామ పంచాయతీ ఆధ్వర్యంలో చర్చలు జరుగుతున్నాయి.