నా భార్యను అప్పగించండి ప్లీజ్..

‘ప్రేమించి పెళ్లి చేసుకున్నాం... నా భార్యను ఆమె పుట్టింటివాళ్లు బలవంతంగా తీసుకెళ్లారు. నా భార్యను నాకు అప్పగించేలా చేయండి ప్లీజ్’ అంటూ ఓ యువకుడు పోలీసులకు ఫిర్యాదు చేశాడు.

వివరాల్లోకి వెళ్తే అనంతపురం జిల్లా తనకల్లులోని బాబేనాయక్ తండాకు చెందిన దేవేంద్రనాయక్ మూడేళ్లు ఓ బేకరీలో పనిచేస్తున్నాడు. అక్కడే ప్రీతి అనే అమ్మాయి పరిచయమైంది. ఆ పరిచయం ప్రేమగా మారింది. పెళ్లి చేసుకుంటామని పెద్దలకు తెలుపగా వారు నిరాకరించారు.

దీంతో మే 25న మదనపల్లిలోని రిజిస్టర్ మ్యారేజ్ చేసుకున్నారు. అదే రోజు ఓ గుడిలో హిందూ సాంప్రదాయం ప్రకారం వివాహం చేసుకున్నారు. అయితే అమ్మాయి తల్లిదండ్రులు దేవేంద్ర నాయక్ పై కదిరి పోలీస్ స్టేషన్ లో కేసుపెట్టారు. దీంతో వధూవరులను పోలీసులు విచారించగా.. ప్రీతి.. భర్తతోనే ఉంటానని చెప్పడం.. పోలీసులు కూడా వాళ్లిద్దరికి మద్దతుగా ఉన్నారు.

ఇదిలా ఉండగా.. ఈనెల 1న ప్రీతి తల్లిదండ్రులు, సోదరుడు మరికొందరితో కలిసి తనపై దాడి చేసి... తన భార్యను బలవంతంగా తీసుకెళ్లారని దేవేంద్ర నాయక్ వాపోయాడు. ‘నా భార్యను నాకు అప్పగించి న్యాయం చేయండి’ అంటూ వేడుకున్నాడు. పెళ్లినాటి ఫొటోలను మీడియా ప్రతినిధులకు అందజేశాడు.