ఆన్‌లైన్‌లోనే పెళ్లి చేసేసుకున్నారు!

ఆన్‌లైన్‌లో చాటింగ్ చేయొచ్చు, స్నేహం చేయొచ్చు, ప్రేమించొచ్చు. ఇది అందరికీ తెలిసిన విషయమే. కానీ ఆన్‌లైన్‌లో పెళ్లి కూడా చేసుకోవచ్చు అని నిరూపించింది ఓ జంట. ఎక్కడో కాదు మన ఇండియాలోనే ఈ పెళ్లి వేడుక జరిగింది.

వివరాల్లోకి వెళ్తే.. కేరళలోని కొల్లం జిల్లాకి చెందిన హెరీస్‌కు , శామ్లాకు పెళ్లి నిశ్చయమైంది. కాగా.. హేరీస్ సౌదీ అరేబియాలోని ఓ కంపెనీలో మార్కెటింగ్ మేనేజర్‌గా పనిచేస్తున్నాడు. సరిగ్గా పెళ్లి రోజుకి వస్తానని చెప్పాడు. దీంతో వధువు తరఫు వారు పెళ్లి ఏర్పాట్లన్నీ చేసేశారు. ఇంతలో పెళ్లి రోజు రానే వచ్చింది. వధూవరుల కుటుంబాలు హాజరయ్యారు. చుట్టాలందరూ పెళ్లికి వచ్చారు. కానీ అసలు వ్యక్తి పెళ్లి కొడుకు మాత్రం రాలేడు. కొన్ని అత్యవసర కారణాల వల్ల హేరీస్ పనిచేసే కంపనీ వారు ఈరోజు తన పెళ్లి అని చెప్పినా కూడా సెలవు ఇవ్వలేదట పాపం. ఇప్పుడెలా అని పెళ్లి మంటపంలో ఇరు కుటుంబాల వారు ఆందోళన చెందారు. అయితే ఎలాగైనా అనుకున్న ముహూర్తానికే పెళ్లి జరిగిపోవాలని నిర్ణయం తీసుకున్నారు. ఇందుకు ఆన్‌లైన్ వేదికను ఆశ్రయించారు.

ఇంకేముంది? వెబ్‌క్యామ్‌లో వరుడు హేరిస్ ఆన్‌‌లైన్‌లోకి వచ్చాడు. ఆన్‌లైన్ లోనే పెళ్లికి సంబంధించిన తంతును పూర్తి చేశాడు. హేరిస్ చూస్తుండగా అతని సోదరి నజిత పెళ్లికూతురు శామ్లా మెడలో తాళి కట్టింది. ఈ విధంగా వధూవరులు ఇద్దరూ వివాహ బంధంతో ఒక్కటయ్యారు.
ఇలాంటి వివాహం ఒకటి జరగటం ఇదే తొలిసారి. ఇప్పుడు కాపురం కూడా ఆన్‌లైన్‌లోనే కానిస్తారా? అని అడక్కండి. అది వారి పర్సనల్.