స్పీకర్‌ను కాకా అంటే... ఉద్యోగం ఊడిపోయింది!

స్పీకర్‌ను కాకా అని సంబోధించిన సెక్యూరిటీ గార్డ్ ఉద్యోగం ఊడిపోడమే కాదు, ఆ ఏజెన్సీ కాంట్రాక్టు కూడా రద్దయిన ఘటన గుజరాత్‌లో చోటు చేసుకుంది. అసెంబ్లీ స్పీకర్‌‌ను పట్టుకుని అంత మాట అంటారా? అంటూ ఓ సెక్యూరిటీ గార్డ్‌తోపాటు ఏజెన్సీకి హాస్పిటల్ ఝలక్ ఇచ్చింది. గుజరాత్ అసెంబ్లీ స్పీకర్‌ రమణ్ లాల్ వోరా జూన్‌ 13న తన కుమారుడితో కలిసి కంటి చికిత్స కోసం గాంధీనగర్‌లోని సివిల్ హాస్పిటల్‌కు వెళ్లారు. ఈ సమయంలో స్పీకర్ కారును ఆసుపత్రి గేటు ఎదురుగా నిలిపా. దీంతో అక్కడికి చేరుకున్న కిరణ్ వాఘేలా అనే 28 ఏళ్ల సెక్యూరిటీ గార్డు ఓ కాకా కారు ఇక్కడ ఆపకూడదు... పక్కకు వెళ్లి నిలుపు’ అంటూ అడ్డుకున్నాడు. అతడు విధి నిర్వహణలో భాగంగా అలా ప్రవర్తించినందుకు ప్రభుత్వం ఆగ్రహం వ్యక్తం చేసింది.

దీనిపై ఆసుపత్రి యాజమాన్యానికి ఫిర్యాదు చేయడంతో అతడిని విధుల నుంచి తప్పించడమే కాదు సెక్యూరిటీ ఏజెన్సీ కాంట్రాక్ట్‌ను కూడా రద్దు చేసుకున్నారు. దీనిపై హాస్పిటల్ యాజమాన్యం వివరణ ఇస్తూ, ‘వోరా పెద్ద మనిషి. అంతే కాకుండా అసెంబ్లీ స్పీకర్‌. అంత పెద్దాయనతో మార్యదపూర్వకంగా ఉండాలి. ఏదో పక్కింటాయనను లేదా బాగా పరిచయమున్న వ్యక్తిని పిలిచినట్లు కాకా అనడం భావ్యం కాదు. అందుకే ఆయన్ని తొలగించామని హాస్పిటల్‌ సూపరింటెండెంట్‌ బిపిన్‌ నాయక్‌ తెలిపారు. అంతే కాదు గతంలోనూ ఈ ఏజెన్సీకి చెందిన సెక్యూరిటీ గార్డులపై ఫిర్యాదులు వచ్చాయని, హెచ్చరించినా వారి తీరు మారలేదని ఆయన పేర్కొన్నారు.

అందుకే నెల రోజుల పాటు ఎలైట్ సెక్యూరిటీ ఏజెన్సీ ఒప్పందాన్ని రద్దు చేస్తున్నట్లు తెలిపారు. ఈ ఘటనపై ప్రతిపక్షాలు విమర్శలు కురిపిస్తున్నాయి. క్షమాపణల లేఖ రాయించుకున్నా చర్యలేంటని ప్రశ్నిస్తున్నారు. అయితే ఈ ఘటనలో తమ ప్రమేయం లేదని గుజరాత్ ఆరోగ్య శాఖ మంత్రి శంకర్ చౌదరి అన్నారు. బుగ్గ కార్లు వాడొద్దు, సాధారణంగా ఉండండి అంటూ ప్రధాని నరేంద్ర మోదీ పిలుపునిస్తూ, వీఐపీ కల్చర్‌ ను రూపుమాపాలని ప్రయత్నిస్తుంటే...అదే పార్టీకి చెందిన సీనియర్ నేత సెక్యూరిటీ గార్డుపై అధికారం ప్రదర్శిచడం ఏంటని నిలదీస్తున్నారు.