దొరికిన బ్యాగ్ తిరిగిచ్చాడు.. జీవితం మారిపోయింది

డబ్బుకు నిజాయతీకి సంబంధం లేదు. నిరుపేదల్లోనూ నిజాయతీపరులు ఎందరో. తినడానికి ఏం లేకున్నా.. పరాయి వ్యక్తుల సొమ్మును ముట్టుకోవడానికి మనసొప్పని పేదలెందరో. అలాంటి ఓ వ్యక్తి గురించి ఇప్పుడు మీరు తెలుసుకోబోతున్నారు. ఇంగ్లండ్‌కు చెందిన డైసీ ఓవెన్స్ అనే 20 ఏళ్ల యువతి ఓ రోజు రాత్రి తన హ్యాండ్ బ్యాగ్ పోగొట్టుకుంది. అందులో నగదు, పర్స్, 400 డాలర్ల విలువైన ఐఫోన్ ఉన్నాయి. ఆ బ్యాగ్‌లో డబ్బులు, ఖరీదైన ఫోన్ ఉండటంతో ఆమె బాధపడింది. బ్యాగ్‌‌పై ఆశలు వదులుకుంది.

కానీ పాల్ కాల్డర్ బ్యాంక్ అనే నిరుపేద యువకుడికి ఆ బ్యాగ్ దొరికింది. అతడికి ఉండటానికి ఇల్లు కూడా లేదు. దీంతో హాస్టల్లో ఉండేవాడు. చేతిలో డబ్బు లేకపోయినప్పటికీ నిజాయతీపరుడైన అతడు ఆ బ్యాగ్‌ను డైసీకి తిరిగి అప్పగించాలని భావించాడు. పోలీస్ స్టేషన్‌కెళ్తే తనే దొంగిలించాడని అనుమానిస్తారని భావించి.. ఆమె అడ్రస్ కనుక్కోని మరీ ఇవ్వాలనుకున్నాడు. ఫ్రెండ్స్‌కు చెబితే మనమేం ఉంచుకుందాం అంటారని వారికి కూడా బ్యాగ్ దొరికిన సంగతి చెప్పలేదు. వీకెండ్లో రెండ్రోజులపాటు ఆ బ్యాగ్ ఎవరిదో కనుక్కోవడానికి ప్రయత్నించాడు. దార్లో కనిపించిన వాళ్లను అడుగుతుంటే.. డైసీకి తెలిసిన వాళ్లు చూసి.. ఆమెను తమ దగ్గరకు రమ్మన్నారు. ఆ బ్యాగ్‌ను పాల్ ఆమెకు తిరిగిచ్చేశాడు.

ఆ బ్యాగ్ తీసుకున్న డైసీ నేను ఇవాళ నిజాయతీ గల ఓ వ్యక్తిని చూశాను. అతడు ఉండటానికి ఇల్లు లేదు. కానీ నా బ్యాగ్‌లో నుంచి ఒక్క పౌండ్ కూడా తీసుకోలేదు. అతడికి ఇల్లు సమకూరుద్దాం.. విరాళాలు ఇస్తారా అని గోఫండ్‌మీ పేజీలో రిక్వెస్ట్ చేసింది. అతడి నిజాయతీ ఎంతో మందిని కదిలించింది. 21 రోజుల్లో 3274 పౌండ్లు విరాళంగా వచ్చాయి. ఊహించిన దాని కంటే ఎక్కువ మొత్తం రావడంతో ఆమె సంతోషం వ్యక్తం చేసింది. ఈ వ్యవహారం మొత్తాన్ని ఆమె ఫేస్‌బుక్ పేజీలో రాసుకొచ్చింది.