తెలియక చేసిన మసాజ్ వల్ల కుమారుడి బలి!

కాలు నొప్పితో విలవిలలాడుతున్న కుమారుడి బాధను చూడలేక మసాజ్‌ చేసింది ఓ తల్లి. కానీ, అదే తన బిడ్డ పాలిట యమగండం అవుతుందని ఊహించలేకపోయింది. తెలియక చేసిన పొరపాటు వల్ల.. చెట్టంత ఎదిగిన కుమారుడు మరణించడంతో ఆమె కన్నీరుమున్నీరైంది. డిల్లీకి చెందిన 23 ఏళ్ల యువకుడు గతేడాది బ్యాడ్మింటన్‌ ఆడుతూ గాయపడ్డాడు. డాక్టర్లు అతడి ఎడమ కాలు చీలమండలం (Ankle) విరిగిపోయినట్లు గుర్తించారు. దీంతో అతడికి ప్లాస్టర్ ఆఫ్ పారిస్ స్లాబ్ సాయంతో కట్టుకట్టారు. ఆ తర్వాత కొన్ని రోజులకు దాన్ని తొలగించినా.. కదలకుండా గట్టిగా కట్టు కట్టడం వల్ల అతడి మడమ భాగంలో రక్తం గడ్డకట్టి (Blood clot) నొప్పి ఎక్కువైంది.

నొప్పితో తల్లడిల్లిపోతున్న కుమారుణ్ని చూసి, అతడి తల్లి.. నూనె రాసి కాలుకు మసాజ్‌ చేసింది. 30 నిమిషాల పాటు చేసిన మసాజ్ వల్ల ఊపిరితిత్తులకు రక్తాన్ని మోసుకెళ్లే రక్తనాళాలు మూసుకుపోవడంతో.. అతడు స్పృహ కోల్పోయాడు. అప్పటి దాకా బాగానే ఉన్న వ్యక్తి అకస్మాత్తుగా పడిపోవడంతో వెంటనే అతణ్ని ఎయిమ్స్‌కు తరలించారు. అక్కడ వైద్యులు ఎంత ప్రయత్నం చేసినా అతడి ప్రాణాలను కాపాడలేకపోయారు.

అతడి మరణానికి కారణాలను తెలుసుకోవడానికి.. మృతదేహానికి పోస్ట్‌మార్టం చేసిన వైద్యులు.. కాలిలో రక్తం గడ్డకట్టినప్పుడు మసాజ్‌ చేయడం వల్ల అది ప్రాణాపాయంగా మారిందని నిర్ధారించారు. అది విన్న తర్వాత.. ఆ తల్లి కుప్పకూలిపోయింది. తన చేతులారా తానే.. కుమారుణ్ని చంపుకున్నానని ఆ తల్లి కన్నీరుమున్నీరైంది.

2016 అక్టోబర్ 31న జరిగిన ఈ ప్రత్యేక కేసు గురించి తాజాగా మెడికో లీగల్ జర్నల్‌లో ఓ కథనాన్ని ప్రచురించారు. బెణకడం లాంటి సాధారణ సందర్భాల్లో మసాజ్ చేస్తే పర్వాలేదుగానీ.. ఫ్రాక్చర్ అయిందో, లేదో తెలుసుకోకుండా మసాజ్ చేస్తే.. ఇలా ప్రమాదకరంగా మారుతుందని ఎయిమ్స్ వైద్యులు చెబుతున్నారు.