సిస్టర్స్ 4 చేంజ్: కవితక్కా.. నీ చొరవకి సలాం!

తెలంగాణ ముఖ్యమంత్రి కేసీఆర్ కుమార్తె, ఎంపీ కల్వకుంట్ల కవిత గురించి కొత్తగా పరిచయం అవసరంలేదు. ఆమె మాట్లాడే తీరు, వ్యవహార శైలి చాలా హుందాగా ఉంటాయి. తండ్రికి తగ్గ తనయగా.. బాధ్యత కలిగిన ప్రజాప్రతినిధిగా టీఆర్ఎస్ వర్గాల మనసుల్ని ఎప్పుడో గెలుచుకున్నారామో. ఎంపీ కాకముందునుంచే, తెలంగాణ జాగృతి అధ్యక్షురాలుగా రాష్ట్ర వ్యాప్తంగా బతుకమ్మ సంబురాలు నిర్వహిస్తూ ఆడపడుచుల మన్ననలు పొందారు. తాజాగా తెలంగాణ ఆడపడుచులకు ఆమె ఇచ్చిన ఒక టాస్క్‌పై ప్రశంసల వర్షం కురుస్తోంది.

ఓ వైపు ద్విచక్ర వాహనదారులకు హెల్మెట్ ప్రాధాన్యతను వివరిస్తూనే.. మరోవైపు ‘రక్షా బంధన్’ను వినూత్నంగా జరుపుకోవాలని ఆడపడుచులకు కవిత పిలుపునిచ్చారు. ఈ రాఖీ పండుగ నాడు అన్నదమ్ములకు హెల్మెట్‌ను గిఫ్ట్‌గా ఇచ్చి కొత్త ట్రెండ్‌ సెట్ చేయాలని సూచించారు. ఈ మేరకు ‘సిస్టర్స్‌ ఫర్‌ ఛేంజ్‌’ అనే కార్యాక్రమాన్ని చేపట్టారు. ఇప్పుడు ఈ కార్యక్రమానికి మంచి స్పందన వస్తోంది. #Sisters4Changeను ట్విట్టర్ ద్వారా ప్రచారం చేస్తున్న కవితను నెటిజన్లు పొగడ్తలతో ముంచెత్తుతున్నారు. ‘కవితక్క నా సిస్టర్‌కి కూడా హెల్మెట్ గిఫ్ట్‌గా ఇస్తా’ అంటూ ఓ నెటిజన్ కామెంట్ చేశాడంటే కవిత ప్రచారం ఎంతబాగా జనాల్లోకి వెళ్లిందో అర్థమవుతోంది.
Anguished by the number of 2-wheeler accidents,I would like to make a serious effort 2 save some lives.JoinMe #Sisters4Change #GiftAHelmet pic.twitter.com/3Psl1aXmWk — Kavitha Kalvakuntla (@RaoKavitha) July 24, 2017
ఈ కార్యక్రమాన్ని జులై 24న కవిత శ్రీకారం చుట్టారు. ‘హెల్మెట్ ధరించకుండా ద్విచక్రవాహనాలు నడపడం వల్ల దేశ వ్యాప్తంగా రోజూ నాలుగు వందల మంది ప్రాణాలు కోల్పోతున్నారు. ఇది చాలా బాధాకరం. మన సోదరుల భద్రత కోసం మనం చేతులు కలుపుదాం. ఈ సారి రాఖీతో కొత్త ట్రెండ్ సెట్ చేద్దాం. మీ సోదరుడికి ఒక హెల్మెట్ గిఫ్ట్‌గా ఇవ్వండి’ అని కవిత ట్వీట్ చేశారు. ఆ ట్వీట్‌ను ఇప్పటి వరకు 875 మంది రీట్వీట్ చేశారు. 4 వేలకు పైగా లైక్ చేశారు. 305 మంది కామెంట్లు పెట్టారు.