అశ్లీల నృత్యాల బాగోతాన్ని పట్టించిన గొడవ!

స్నేహితుడి పుట్టిన రోజు సందర్భంగా అతడి స్నేహితులంతా కలిసి ఓ ఫాంహౌస్‌లో యువతలతో పార్టీ చేసుకున్నారు. అశ్లీల నృత్యాలు చేస్తూ చిందులు తొక్కారు. తాగిన మత్తులో ఒకరినొకరు కొట్టుకుంటూ.. యువతులతో అసభ్యంగా ప్రవర్తించడం మొదలుపెట్టారు. ఈ గొడవ... పోలీసులకు పట్టించేలా చేసింది. ఈ ఘటన మరెక్కడో కాదు, హైదరాబాదులోని శంషాబాద్‌లో చోటు చేసుకుంది. నగరంలోని పాతబస్తీకి చెందిన పర్వేజ్ (20) పుట్టిన రోజు సందర్భంగా తన స్నేహితుడు రెహ్మాన్ సాయంతో శంషాబాద్‌ నుంచి మామిడిపల్లికి వెళ్లే దారిలో ఉన్న రుక్మదీన్ ఫాంహౌస్‌లో పార్టీ ఏర్పాటు చేశాడు.

ఈ సందర్భంగా మొగల్ పురా నుంచి ముగ్గురు మహిళా డ్యాన్సర్లను తీసుకొచ్చారు. అర్ధరాత్రి ఒంటి గంట తర్వాత కొందరు స్నేహితులు పార్టీని ఆపేద్దామని సూచించగా, మరికొందరు కొనసాగించాలని వాదించారు. ఈ గొడవ చిలికి చిలికి గాలివానలా మారింది. కొందరు డ్యాన్సర్లతో అసభ్యంగా ప్రవర్తించారు. దీంతో ఆ ముగ్గరు యువతులు భయంతో... తమను అక్కడికి తీసుకొచ్చిన ఆటో డ్రైవర్‌కు ఈ విషయం చెప్పి పారిపోడానికి ప్రయత్నించారు.

ఇది తెలిసి పర్వేజ్ స్నేహితులు ఆ ఆటోను వెంబడించారు. మామిడిపల్లి రోడ్డులో ఆటోను అటకాయించి డ్రైవర్‌ను చితకబాదారు. అదే సమయంలో అక్కడ గస్తీ తిరుగుతున్న పహాడీషరీఫ్ పోలీసులు గమనించారు. ముగ్గురు యువతలతోపాటు సలీం, షోయబ్, ముక్రంతో పాటు మరో యువకుడిని అదుపులోకి తీసుకున్నారు. పర్వేజ్, రెహ్మాన్‌లు పరారీలో ఉన్నారు.