జేఎన్‌యూ విద్యార్థినిపై ఐఈఎస్ అధికారి ఆరేళ్లుగా...

దేశ రాజధాని ఢిల్లీలో మహిళలపై దారుణాల పరంపర కొనసాగుతోంది. తాజాగా ఓ యువతిపై యువ అధికారి లైంగిక వేధింపులకు పాల్పడిన ఘటన వెలుగులోకి వచ్చింది. జవహర్‌లాల్‌ నెహ్రూ విశ్వవిద్యాలయానికి చెందిన విద్యార్థినిపై లైంగిక వేధింపులకు పాల్పడినందుకు ఇండియన్‌ ఇంజినీరింగ్‌ సర్వీసెస్‌ యువ అధికారిని పోలీసులు అదుపులోకి తీసుకున్నారు.

ఆ యువతి పట్ల అసభ్యంగా ప్రవర్తించి, లైంగిక వేధింపులకు పాల్పడటమే కాకుండా చంపుతానంటూ కూడా బెదిరించడంతో 26 ఏళ్ల యువ అధికారిని అరెస్ట్ చేసినట్లు పోలీసులు తెలిపారు. పోలీసులు తెలిపిన వివరాల ప్రకారం 2012 నుంచి ఆ యువతిపై లైంగిక వేధింపులకు పాల్పడినట్లు ఆదివారం ఫిర్యాదు చేసింది. మైనర్‌గా ఉన్నప్పుడే లైంగికంగా వేధించడంతోపాటు సామాజిక మాధ్యమాల ద్వారా బెదిరించినట్లు తమ దర్యాప్తులో గుర్తించామని అధికారులు తెలియజేశారు.

నిందితుడికి బాధితురాలు గత ఆరేళ్లుగా తెలుసని, అతడితో స్నేహానికి ఆమె నిరాకరించడంతోనే వేధింపులకు పాల్పడినట్లు తమ ప్రాథమిక విచారణలో వెల్లడైందని పోలీసులు తెలిపారు. నిందితుడిపై వసంత్‌ కుంజ్‌ నార్త్‌ పోలీస్‌స్టేషన్‌లో పోక్సో చట్టంతోపాటు ఐపీసీ సెక్షన్ 354,354ఏ, 354డి, 506, 509 కింద కేసును నమోదు చేసినట్లు దక్షిణ జిల్లా అదనపు డిప్యూటీ కమిషనర్‌ చిన్మయ్‌ బిస్వాల్‌ తెలియజేశారు. నిందితుడిని సిటీ కోర్టు ఎదుట హాజరు పరిచి జైలుకు తరలిస్తామని అధికారులు వివరించారు.