లైంగిక వేధింపులు: రిసెర్చ్ స్కాలర్‌పై ఫిర్యాదు!

తనపై ఓ రిసెర్చ్ స్కాలర్ క్యాంపస్ ఆవరణలోనే లైంగిక వేధింపులకు పాల్పడ్డాడంటూ పీహెచ్‌డీ విద్యార్థిని పోలీసులకు ఫిర్యాదు చేసింది. ఈ ఘటన ప్రతిష్టాత్మక విద్యా సంస్థ ఐఐటీ రూర్కీలో చోటు చేసుకుంది. ఆమె ఫిర్యాదుపై స్పందించిన పోలీసులు నిందితుడిపై ఐపీసీ సెక్షన్ 354, 323 కింద కేసు నమోదు చేసి విచారణ చేపట్టారు. పోలీసులు తెలిపిన వివరాల ప్రకారం ఐఐటీ రూర్కీ ఎలక్ట్రానిక్స్ ఇంజినీరింగ్ విభాగంలో బాధిత మహిళ పీహెచ్‌డీ చేస్తోంది.

మంగళవారం సాయంత్రం డిపార్ట్‌మెంట్ నుంచి వసతిగృహానికి వెళ్తున్నప్పుడు నిందుతుడు పలకరించిన తర్వాత తనపై భౌతిక దాడి చేశాడని ఆమె పోలీసులకు తెలిపింది. అయితే బాధితురాలికి నిందితుడితో గతంలో సంబంధం ఉండేదని, ఇద్దరి మధ్య బేధాభిప్రాయాలు వచ్చి విడిపోవడంతోనే ఈ ఘటన చోటు చేసుకున్నట్లు ఐఐటీ వర్గాలు తెలిపాయి.

అంతే కాకుండా ఇద్దరి మధ్య 2015 నుంచే పరిచయం ఏర్పడిందని పేర్కొన్నాయి. దీనిపై విచారణ ప్రారంభించామని, బాధితురాలు ఇచ్చిన ఫిర్యాదులో అనేక సందేహాలు వ్యక్తమవుతున్నాయని పోలీస్ అధికారులు తెలిపారు. దీనిపై పూర్తిస్థాయి విచారణకు ఓ మహిళ సబ్-ఇన్‌స్పెక్టర్‌ను కూడా నియమించామని, దర్యాప్తు పూర్తయిన తర్వాత కేసుపై మరింత ముందుకు వెళ్తామని రూర్కీ సర్కిల్ ఇన్‌స్పెక్టర్ స్వపన్ కిశోర్ సింగ్ వివరించారు.