గుండెపోటుతో కుప్పకూలిన యజమానిని కాపాడేందుకు శునకం తపన.. వైరల్ వీడియో

మనిషికి శునకాలతో ఉన్న అనుబంధం ఈనాటిది కాదు. వేల ఏళ్లుగా విశ్వసనీయమైన మిత్రుడిగా శునకాలు మనకు సేవలు అందిస్తున్నాయి. నేరస్థులను పట్టుకోవడంలో, డ్రగ్స్ అక్రమ రవాణాను అరికట్టడంలో, మందుపాతరలను గుర్తించడంలో ఇవి పోలీసులకు కూడా తమ వంతు సాయం అందిస్తున్నాయి. ప్రత్యేక శిక్షణ పొందిన పోలీస్ డాగ్స్.. మనిషికి ఏ మాత్రం తీసిపోవంటే ఆశ్చర్యం అక్కర్లేదు. మ్యాడ్రిడ్ పోలీసులు గుండెపోటు బారిన పడిన వారి ప్రాణాలు కాపాడేలా.. సీపీఆర్ చేయడంలో ఓ శునకానికి శిక్షణ ఇచ్చారు.

గుండె పోటుతో బారిన పడిన వ్యక్తి ఛాతి మీద బాదుతూ.. సీపీఆర్ చేయడం వల్ల అతడి ప్రాణాలను కాపాడొచ్చనే సంగతి తెలిసిందే. ఓ వ్యక్తి గుండె పోటుతో కుప్పకూలగా.. దూరం నుంచి పరిగెత్తుకుంటూ వచ్చిన శునకం అతడి ఛాతి మీద ముందు కాళ్లతో బాదింది. తర్వాత అతడు శ్వాస తీసుకుంటాన్నాడో లేదో తెలుసుకోవడం కోసం చెవిని అతడి ముక్కు దగ్గరగా ఉంచింది. మళ్లీ అతడి ఛాతీని గట్టిగా కాళ్లతో బాదుతూ ప్రాథమిక చికిత్స అందించింది.

పోలీస్ డాగ్ ట్రైనర్ శిక్షణలో భాగంగా కావాలనే ఇలా పడిపోగా.. ఆ శునకం సీపీఆర్ చేసింది. ఈ వీడియో సోషల్ మీడియాలో వైరల్‌గా మారింది. మూడు రోజుల్లో 22 లక్షల మందికి పైగా దీన్ని వీక్షించారు. ఆపద సమయంలో మనిషి ప్రాణాలను కాపాడేలా శిక్షణ పొందిన శునకాన్ని చూసి శభాష్ అంటున్నారు.