వేధింపులు నిరసిస్తూ అర్థరాత్రి వీధుల్లోకి...

నూతన సంవత్సర వేళ బెంగళూరు వీధుల్లో మహిళపై జరిగిన అమానుషాలను నిరసిస్తూ మహిళా లోకం కదం తొక్కింది. దేశవ్యాప్తంగా 30 నగరాల్లోని మహిళలు అర్థరాత్రి రోడ్లపైకి వచ్చి తమ నిరసన వ్యక్తం చేశారు. మహిళలకు భద్రత కల్పించాలన్న డిమాండ్‌తో నిరసన ప్రదర్శనలు నిర్వహించారు. ఆక్యుపయింగ్ ది నైట్ స్ట్రీట్స్ పేరుతో ఉత్తరాన దేశ రాజధాని ఢిల్లీ నుంచి తూర్పున కోల్‌కతా, దక్షిణాన చెన్నై, పశ్చిమాన ముంబై వరకు వేలాదిగా మహిళలు రోడ్లపైకి చేరుకుని స్వేచ్ఛా నినాదాలతో హోరెత్తించారు.

వీరిలో విద్యార్థినులు, మహిళా ఉద్యోగులే అధికంగా ఉన్నారు. మహిళలకు సమాన హక్కులు, భద్రత కల్పించాలంటూ పాటలు పాడుతూ, నృత్యాలు చేస్తూ నిరసన తెలిపారు. తమకు స్వేచ్ఛ ప్రసాదించాలని, వేధింపులు ఆపాలని నినాదాలు చేశారు. ఏ సమయంలోనైనా తమకు భద్రత లేకుండా పోయిందని, ఈ పరిస్థితి మారాలంటూ నినదించారు.

పన్నెండేళ్ల వయసు నుంచి బయట తిరగాలంటే భయపడుతూనే ఉన్నా, మహిళలు వేసుకున్న దుస్తుల గురించి అడుగుతారే తప్ప, వేధిస్తున్న మృగాళ్ల గురించి మాట్లాడరెందుకని ఈ కామర్స్ సంస్థలో ప్రోగ్రామ్ మేనేజర్ అనురాధ సిన్హా అన్నారు. నా పాపకిప్పుడు మూడేళ్లు... తనకూ ఇదే పరిస్థితి రాకూడదనే నేనిప్పుడు వీధిలోకి వచ్చానంటూ అమె వ్యాఖ్యానించారు.