ఆఫీసులోనే ఇన్ఫీ ఉద్యోగి అనుమానాస్పద మృతి

చెన్నైలో ఇన్ఫోసిస్ ఉద్యోగి దారుణమైన పరిస్థితుల్లో శవమై కనిపించాడు. ఆఫీసులోని బాత్రూమ్ లోనే ఆయన విగతజీవిగా పడి ఉండడం ఉద్యోగులను భయభ్రాంతులకు గురి చేసింది. అతనికి హత్యా లేక ఆత్మహత్యా అనే తేలాల్సి ఉంది. అయితే బాత్రూమ్ లో ఆయన శరీరం నగ్నంగా పడి ఉంది. దీనిని బట్టి హత్యే కావచ్చని పోలీసులు భావిస్తున్నారు. ప్రస్తుతానికి అనుమానాస్పద మృతిగా కేసు నమోదు చేశారు. అతడిని సాఫ్ట్ వేర్ ఇంజినీర్ ఇళయరాజా (30)గా గుర్తించారు. బుధవారం ఉదయం ఇతని మృతదేహాన్ని స్వీపర్లు కనుగొన్నారు. మంగళవారం రాత్రి సిబ్బంది వెళ్లే వరకు అంతా బాగానే ఉంది. కనుక అర్థరాత్రి దాటాకే ఏదో జరిగి ఉంటుందని పోలీసులు భావిస్తున్నారు.

దేహంపై ఎలాంటి గాయాలు లేవు. అయితే మృతదేహం పడి ఉన్న తీరు అనుమానాలను రేకెత్తిస్తోందని అందుకే అనుమానాస్పద కేసుగా తేల్చామని చెప్పారు. ఆత్మహత్య చేసుకోవాలనుకునేవారు దుస్తులన్నీ తీసేసి చేసుకోవాల్సిన అవసరం ఏముంటుందని పోలీసుల వాదన. సహోద్యోగి మరణంతో ఇన్ఫోసిస్ లో విషాదం నెలకొంది. స్నేహితులు షాక్ కు గురయ్యారు. ఇన్ఫోసిస్ యాజమాన్యం ఇది తమకు ఊహించని పరిణామమని, దర్యాప్తునకు పూర్తిగా సహకరిస్తామని తెలిపింది.