జల్లికట్టు చరిత్ర ఏంటి? ఎందుకు నిర్వహిస్తారు?

జల్లికట్టు స్ఫూర్తితో విశాఖ ఆర్కే బీచ్‌లో ప్రత్యేక హోదా కోసం పోరాటం చేసేందుకు ఆంధ్రప్రదేశ్ యువత సిద్ధపడుతోంది. తమ సంస్కృతి, సంపద్రాయాలను కాపాడుకోవడానికి తమిళులు ఎంతటి పోరాటానికైనా వెనుకాడరని జల్లికట్టుకు అనుమతి ఇచ్చేవరకూ వారు చేసిన శాంతియుత పోరాటం తెలియజెప్పింది. అసలు ఇంతకూ ఈ జల్లికట్టు అంటే ఏమిటి? ఈ క్రీడ కోసం తమిళులు ఇంతలా పోరాడటానికి కారణం ఏంటో తెలుసా?

తమిళనాట జల్లికట్టుకు ఎంతో ప్రాచీన చరిత్ర ఉంది. ఏటా పొంగల్ సమయంలో కనుమ నాడు ఈ వేడుకను నిర్వహిస్తారు. క్రీ.పూ. 400-100 ఏళ్ల మధ్య కాలంలోనే జల్లికట్టు నిర్వహించినట్లు ఆధారాలున్నాయి. ఈ క్రీడ నిర్వహించిన తొలి రోజుల్లో ఎద్దును లొంగదీసుకున్న ధైర్యవంతులైన యువకులను మహిళలు తమ భర్తలుగా ఎన్నుకునేవారు. తర్వాతి కాలంలో యువకులు తమ ధైర్య సాహసాలను నిరూపించుకునే ఆటగా ఇది రూపాంతరం చెందింది. ఎద్దు మెడకు బంగారం లాంటి విలువైన పట్టీని కట్టేవారు. పరిగెడుతున్న ఎద్దును పట్టుకొని ఆ పట్టీని తీసుకున్నవారిని విజేతగా ప్రకటించేవారు. వారికి బహుమతి అందించేవారు.

నీలగిరి జిల్లాలోని కరిక్కియూర్ గ్రామంలో దాదాపు 3500 ఏళ్లనాటి శిలా ఫలకాలపై ఎద్దులను మనుషులు తరుముతున్న దృశ్యాలు చెక్కి ఉన్నాయి. దీన్ని బట్టి నాటికే జల్లికట్టు ప్రాచుర్యం పొందిందని తెలుస్తోంది. మదురై పట్టణానికి 35 కిలోమీటర్ల దూరంలోని కళ్లుత్తు మెట్టుపట్టి అనే ప్రాంతంలో 1500 ఏళ్ల క్రితం నాటి రాతి ఫలకం లభ్యమైంది. ఎద్దును మనిషి లొంగదీసుకుంటున్నట్లుగా దీనిపై చిత్రించారు.

ప్రస్తుత రోజుల్లో ఎద్దు మెడకు ఏ పట్టీ కట్టడం లేదు. పరిగెడుతున్న ఎద్దును లొంగదీసుకోవడానికే నేటి జల్లికట్టు పరిమితమైంది. ఇందులో ఎద్దు కాళ్ల కింద పడటం, దాన్ని లొంగదీసుకునే క్రమంలో కొమ్ములు శరీరంలోకి దిగడం వల్ల గాయాలయ్యే ప్రమాదం. భారీ జనం మధ్యలో వదలడం వల్ల ఎద్దు బెదిరే అవకాశం ఉంది గానీ.. దాని ప్రాణాలకు దాదాపుగా ఎలాంటి ముప్పు ఉండదు.

జనం మధ్యలోకి ఎద్దును వదలగా.. దాని కొమ్ములు లేదా తోకను పట్టుకొని.. చేతులతోనే నియంత్రించేందుకు చాలా మంది యువకులు ప్రయత్నిస్తారు. ఎద్దు మూపురాన్ని బలంగా పట్టుకొని లొంగదీసుకోవాలని చూస్తారు. జల్లికట్టు కోసం రైతులు ఎద్దులను ప్రత్యేకంగా సన్నద్ధం చేస్తారు. ఎద్దుల కాళ్లు బలాన్ని సంతరించుకోవడం కోసం వాటితో ఈత కొట్టిస్తారు. ఎద్దు బలంగా, ఆరోగ్యంగా ఉండటం కోసం అనేక జాగ్రత్తలు తీసుకుంటారు.