మహాత్మా.. నీ మనవడికి ఎంత కష్టం!

మహాత్మా గాంధీ.. దేశానికి స్వాతంత్ర్యం కోసం అహర్నిశలు శ్రమించిన నాయకుడాయన. ఆయన త్యాగాలకు, పోరాట స్ఫూర్తికి గుర్తుగా జాతిపితగా పిలుస్తూ, వీధివీధినా ఆయన విగ్రహాలతో నిరంతరం స్మరించుకుంటాం. అలాంటి మహాత్ముడి మనవడు నేడు అత్యంత దుర్భర పరిస్థితుల్లో చివరి రోజుల్ని వెళ్లదీస్తున్నాడు. ఉప్పు సత్యాగ్రహంలో గాంధీజీ చేతికర్రను పట్టుకుని ఆయన్ను ముందుకు నడిపిన కానూ గాంధీ నేడు వయోభారంతో తీవ్ర ఇబ్బందులు పడుతున్నాడు. 96 ఏళ్ల వయసున్న ఆయన సూరత్‌లోని ఓ ట్రస్ట్ హాస్పిటల్లో అనాథగా పడి ఉన్నారు. గాంధీ మనవడిగా, నాసా సైంటిస్ట్‌గా ప్రపంచానికి సుపరిచితుడైన ఆయన ఇప్పుడు ఉండేందుకు గూడు లేక, పట్టించుకునే నాథుడు లేక ఇబ్బందికర జీవితాన్ని గడుపుతున్నారు. ఆయనకు భార్య శివలక్ష్మి తప్ప తోడెవరూ లేరు. ఆమెకు కూడా ఆరోగ్యం అంత బాగోలేదు. 40 ఏళ్లపాటు అమెరికాలో ఉన్న వీరు రెండేళ్ల కిందట భారత్ తిరిగొచ్చారు. ఈ దంపతులకు సంతానం లేదు. తమకున్న సంపదనంతా దానధర్మాలు చేశారు.

భారత్‌లో సొంత ఇల్లు కూడా లేకపోవడంతో కొద్ది రోజులు ఆశ్రమాల్లో కాలం వెళ్లదీశారు. ఇటీవల ఆయన ఆరోగ్యం బాగోలేకపోవడంతో రెండు వారాలుగా సూరత్‌లోని రాధాకృష్ణన్ ఆలయం ఆధ్వర్యంలో నడుస్తున్న ఆస్పత్రిలో ఉచితంగా చికిత్స పొందుతున్నారు. ముంబై, బెంగళూరుల్లో ఉంటున్న కానూ గాంధీ సోదరీమణులు కూడా వయోభారంతో ఇబ్బందులు పడుతుండటంతో ఫోన్లోనే సోదరుడి వివరాలు తెలుసుకుంటున్నారు.

గత మే నెలలో కానూ గాంధీ ప్రధాని మోదీతో మాట్లాడారు. ఆయనకు సాయం చేస్తామని ప్రధాని హామీ ఇచ్చారు కానీ, తర్వాత పీఎంవో నుంచి ఈ కానూ గాంధీ విషయంలో స్పందన కొరవడింది. గత నెలలో కానూకు పక్షవాతం వచ్చింది. నాటి నుంచి శరీరంలోని ఎడమ వైపున్న అవయవాలు పని చేయటం లేదు. ఆయన మంచం నుంచి లేవలేని స్థితిలో వెంటిలేటర్‌పైనే ఉన్నారు. ఆయన భార్య కూడా అనారోగ్యంతో బాధపడుతున్నారు. ఉప్పు సత్యాగ్రహంలో పాల్గొని జీవించి ఉన్న అతి కొద్ది మందిలో ఆయన ఒకరు. అలాంటి వ్యక్తిని ప్రభుత్వం ఆదుకోవాలని పలువురు కోరుతున్నారు.