ఆ ఎమ్మెల్యే తలో రూ.3 లక్షలు పంచాడట!

కేంద్ర ప్రభుత్వం రూ.500, రూ.1000 నోట్లపై నిషేధం విధించడంతో నల్ల పెద్దల కష్టాలు పెరిగిపోతున్నాయి. కర్ణాటకలోని కోలార్ ఎమ్మెల్యే తన వద్దనున్న బ్లాక్ మనీని వదిలించుకొనేందుకు ఓ పథకమే వేశాడంటూ సోషల్ మీడియాలో తెగ ప్రచారం అవుతోంది. తన దగ్గర భారీగా మూలుగుతున్న నల్లధనాన్ని చెలమణిలోకి తెచ్చేందుకు, రూ.500 కరెన్సీలు చెల్లకుండా పోయే ప్రమాదం నుంచి కాపాడేందుకు ఆయనకో ఐడియా తట్టిందట. తన దగ్గరున్న సొమ్మును నమ్మకస్తులైన వారికి తలో రూ.3 లక్షల చొప్పున పంచాడంటూ.. ఆయన డబ్బును పంచుతున్న ఫొటోలను షేర్ చేశారు.

అయితే ఈ విషయాన్ని ఆయన తీవ్రంగా ఖండించారు. ఆ ఫొటోలు సోమవారం నాటివని, సహకార బ్యాంకుల తరఫున అర్హులైన వారికి రుణంగా వాటిని అందజేశానని ఆయన వివరణ ఇచ్చారు. మేం లబ్ధిదారులకు మేం చెక్కులను ఇచ్చాం. వాటిని నగదుగా మార్చి.. వారికి అందజేసే సందర్భంలో తీసిన ఫొటోలివని సహకార బ్యాంకు అధ్యక్షుడు తెలిపారు. ఎమ్మెల్యే సొమ్మును సోమవారమే అందజేయగా, రూ.500, రూ.1000 నోట్లను రద్దు చేస్తూ మోదీ ప్రభుత్వం మంగళవారం ప్రకటన వెలువరించిందని ఆయన గుర్తు చేశారు.