అమ్మ ఆఖరి కోరిక తీర్చిన హాస్పిటల్

హాస్పిటల్ బెడ్ మీద, మరణం అంచుల్లో ఉన్న అమ్మ చివరి కోరిక తీర్చడం కోసం ఓ కుమారుడు ఆన్‌లైన్ ద్వారా పెళ్లాడాడు. ఆర్యోగ పరిస్థితి విషమంగా ఉండటంతో బసవతి రాయ్ బర్ధాన్ అనే మహిళ కోల్‌కతాలోని రూబీ జనరల్ హాస్పిటల్‌లో చేరింది. కొడుక్కి పెళ్లి చేయాలనేది ఆమె చివరి కోరిక. కానీ కాబోయే కోడలేమో అమెరికాలో ఉంది. దీంతో అబ్బాయి పెళ్లి చూడకుండానే కన్నుమూస్తానని తల్లి మనసు తల్లడిల్లింది. ఈ విషయం తెలుసుకున్న హాస్పిటల్ యాజమాన్యం ఆమె కోరిక తీర్చడానికి తన వంతు సహకారం అందించింది.

దీంతో గురువారం సాయంత్రం నాలుగు గంటలకు వారిద్దరికీ పెళ్లి బెంగాలీ సంప్రదాయం ప్రకారం ఘనంగా నిర్వహించారు. ఉన్న ఫళంగా అమెరికా నుంచి వచ్చేయడం కుదరదు కాబట్టి.. వారి వివాహాన్ని స్కైప్ ద్వారా జరిపించారు. బసవతి రాయ్ కుమారుడు ఆమె పక్కనే ఉండగా.. ల్యాప్‌టాప్ ద్వారా ఒకరినొకరు చూసుకుంటూ పెళ్లాడారు.

హాస్పిటల్ బెడ్ మీది నుంచే కొడుకు వివాహాన్ని వీక్షించిన ఆ తల్లి మనసు ఆనందంతో ఉప్పొగింది. అమ్మ ఆఖరి కోరిక తీర్చేందుకు సహకరించిన హస్పిటల్ యాజమాన్యానికి ఆమె కుమారుడు ధన్యవాదాలు తెలిపాడు.