ప్రసవాలకు పెద్ద దిక్కవుతోన్న 108 వాహనాలు!

సాధారణంగా శిశువులు ఇంట్లోనో.. ఆసుపత్రుల్లోనో పుడతారు. కానీ, కర్ణాటక రాష్ట్రంలో 108 ఆంబులెన్సుల్లోనే ఎక్కువగా ప్రసవాలు నమోదయ్యాయి. ఈ రాష్ట్రంలో గడిచిన రెండేళ్లలో రికార్డు స్థాయిలో 4360 మంది శిశువులు ఈ మెడికల్ ఎమర్జెన్సీ వెహికిళ్లలోనే పుట్టారు. 2015-16లో 1955 మంది, 2016-17లో 2405 మంది శిశువులు ఆంబులెన్సుల్లో జన్మించారు. ఇవి ఎక్కువగా గ్రామీణ ప్రాంతాల్లోనే చోటు చేసుకోవడం గమనార్హం. శ్రామిక కుటుంబాలకు చెందిన గర్భిణీలు నెలలు నిండే వరకూ వ్యవసాయం తదితర రంగాల్లో వివిధ పనుల్లో పాల్పంచుకోవడం, పనుల్లో నిమగ్నమై ఉన్నప్పుడే పురిటి నొప్పులు రావడంతో.. ఆంబులెన్స్‌లను ఆశ్రయించడం దీనికి కారణం అని అధికారులు చెబుతున్నారు.

సాధారణంగా ప్రసవానికి 5 నుంచి 6 గంటల సమయం పడుతుందట. దీంతో జిల్లా కేంద్రాలకు దూరంగా ఉండే మారుమూల గ్రామాల నుంచి పురిటి నొప్పులతో బాధ పడుతున్న గర్భిణిలను తరలించే క్రమంలో.. ఆంబులెన్సుల్లోనే శిశువుల జననాలు అధికంగా చోటు చేసుకుంటున్నాయి.

ఈ నేపథ్యంలో ఆంబులెన్సుల్లో సేవలందించే నర్సులకు.. ప్రసవాలకు సంబంధించి ప్రత్యేక శిక్షణ కూడా అందిస్తోంది రాష్ట్ర ప్రభుత్వం. తద్వారా నవజాతా శిశు మరణాల రేటు కూడా గణనీయంగా తగ్గిందట. దీంతో కన్నడవాసులు ‘థాంక్స్ టు ఆంబులెన్స్ సర్వీసెస్’ అని తమ సంతోషం వ్యక్తం చేస్తున్నారు.
Read this in Kannada