హనీమూన్‌కి వెళితే చిరుత భయపెట్టింది

కొత్తగా పెళ్లయిన జంట హనీమూన్ కు వెళితే... అక్కడ వారికి చెమటలు పట్టించింది చిరుత. పూర్తి వివరాల ప్రకారం.... మీరట్ కు చెందిన సుమిత్, శివానీ దంపతులకు కొత్తగా పెళ్లయింది. వారిద్దరూ ఉత్తరాఖండ్ లోని నైనిటాల్ కు హనీమూన్ కు వెళ్లారు. ముందుగానే హోటల్ గదిని బుక్ చేసుకున్నారు. ఆదివారం తెల్లవారుజామున 4.45గంటలకు పెద్ద శబ్దం వచ్చింది. సుమిత్ లేచి చూసేపరికి ఓ కిటీకీ గుండ చిరుత రావడం కనిపించింది. అది నేరుగా బాత్రూంలోకి వెళ్లి కూర్చుంది. వెంటనే సుమిత్ బాత్రూం తలుపు గడియ పెట్టేసి, హోటల్ సిబ్బందికి సమాచారం అందించాడు. హోటల్ వాళ్లు పోలీసులకు, అటవీ అధికారులకు సమాచారం ఇచ్చారు. వారు మత్తు ఇంజెక్షన్లు, వల అన్నింటినీ పట్టుకుని వచ్చారు. తలుపు తీసేసరికి చిరుత వారి నుంచి తప్పించుకుని పారిపోయింది. అది అడవిలోకి వెళ్లి ఉంటుందని అటవీ అధికారులు భావిస్తున్నారు. హనీమూన్ కు వచ్చిన జంట మాత్రం కాసేపు భయంతో వణికిపోయింది. భార్య శివానీ తాను భయపడిన మాట వాస్తవమే కానీ... చిరుతను ఇంత దగ్గరగా చూస్తాననుకోలేదని ఆనందంగా చెబుతోంది. కిటికీకి గ్రిల్స్ లేకుండా కేవలం అద్దం మాత్రమే ఉండడం వల్ల, దానిని పగుల గొట్టి చిరుత లోపలికి ప్రవేశించింది.