కుక్కను వేటాడబోయి బావిలో పడ్డ పులి

చిత్రం భళారే విచిత్రం అంటే ఇదేనేమో... ఎరక్కబోయి వచ్చాను ఇరుక్కుపోయాను అని అన్న ఇదేనేమో... ఇలాంటి సంఘటనలు చూసే మన వాళ్లు ఇలాంటి సామెతలు చెప్పి ఉంటారు. గుజరాత్లోని రాజ్ కోట్లో ఈ అరుదైన ఘటన చోటుచేసుకుంది. వేటకు దిగిన చిరుతపులి, తృటిలో ప్రాణాలు దక్కించుకున్న వీధి కుక్క రెండూ ఒకే చోట ఇరుక్కుపోయాయి. అసలు పని పక్కన పెట్టి ముందు ప్రాణాలు కాపాడుకునేందుకు వెంపర్లాడాయి. అటు చిరుత ఇటు కుక్క రెండు పక్క పక్కనే ఉన్నా ఒకర్ని ఒకరు పట్టించుకోలేని పరిస్థితి. ఎవరి ప్రాణాలు వాళ్లు కాపాడుకోవాల్సిన పరిస్థితి. ఏ మాత్రం పట్టుతప్పిన, అలసిపోయి నీట మునిగి చావాల్సిన దుస్థితి.

చిరుత తరుముకు రావడంతో కుక్క ముందు వెనకా ఆలోచించకుండా ఎటు పడితే అటు పరుగెత్తింది. ఆకలితో నకనకలాడుతున్న చిరుత కూడ ఇది అడవి కాదు జనారణ్యం అని మరిచి తరమడం మొదలు పెట్టింది. ఈక్రమంలో రెండూ ఒకే బావిలో ప్రమాదవశాత్తు పడిపోయాయి.

రెండింటికి ఏమి చేయాలో అర్థం కాని దుస్థితి. దీంతో తలా ఓ పక్కకు వెళ్లి గోడల్ని గట్టిగా పట్టుకొని నీట మునిగిపోకుండా కష్టపడ్డాయి. ఇలా ఏకంగా నాలుగు గంటలు గడిచింది. విషయం వెలుగులోకి రావడంతో స్థానికులంతా తలా ఓ చేయి వేసి రెండింటినీ బయటకు తీశారు. ఎప్పటి మాదిరిగానే ఈసారి కూడా అటవీశాఖ సిబ్బంది అంతా అయిన తర్వాత తీరిగ్గా ఘటనా స్థలానికి చేరుకున్నారు.