మందు కొడితే.. కడుపు చీలిపోయింది!

ఓ బారులో మద్యం తాగిన ఓ యువకుడి కడుపు చీలిపోయి కన్నం పడింది. ఈ ఘటన ఢిల్లీలోని గుర్గావ్‌లో చోటు చేసుకుంది. స్నేహితులతో కలిసి బారులో మందు తాగడానికి వెళ్లిన 30 ఏళ్ల యువకుడు.. పొగలు కక్కే కాక్‌టెయిల్‌ను ఆర్డర్ చేశాడు. అది తాగిన కొద్ది సేపట్లోనే అతడి పొట్ట ఉబ్బడం మొదలైంది. చాలా అసౌకర్యంగా అనిపించింది. ఊపిరి కూడా అందలేదు. తీవ్రమైన నొప్పితో కేకలు పెట్టాడు.

దీంతో అతన్ని వెంటనే గుర్గావ్‌‌లోని ఓ ఆసుపత్రికి తరలించారు. అతనికి శస్త్ర చికిత్సలు చేసిన వైద్యులు కడుపు చిలీపోయి.. కన్నం ఉండటం చూసి ఆశ్చర్యపోయారు. దీంతో, కొంత భాగం తొలగించి, కుట్లు వేశారు. ప్రస్తుతం ఆ యువకుడు ప్రాణగండం నుంచి బయటపడ్డాడు. బాధితుడు ఢిల్లీకి చెందిన వ్యాపారి అని తెలిసింది.

అసలేం జరిగింది?:
మద్యం త్వరగా చల్లబడేందుకు లిక్విడ్ నైట్రోజన్‌ను పోస్తారు. ఈ సందర్భంగా పొగలు ఏర్పడతాయి. ఆ పొగలు పూర్తిగా ఆవిరైపోయిన తర్వాతే ఆ మద్యం తాగాలి. అయితే, ఆ యువకుడు లిక్విడ్ నైట్రోజన్‌తో సహా తాగేయడంతో కడుపులో రంధ్రం ఏర్పడింది.