ప్రేయసికి ముద్దు పెట్టి... పెద్దల్ని ఒప్పించాడు

ఒక అమ్మాయి, ఒక అబ్బాయి ప్రేమించుకున్నారు. వారి ప్రేమకి పెద్దలు అంగీకరించలేదు. అమ్మాయికి వేరే పెళ్లి చేయడానికి సిద్ధపడ్డారు. ప్రేయసికి వేరొకరితో పెళ్లి అయిపోతుంటే ఎవరు చూస్తూ ఊరుకుంటారు. ఆ యువకుడు కూడా ఊరుకోలేదు. ఆ అబ్బాయి చేసిన పని వారి పెళ్లికి బాటలు వేసింది. అసలేం జరిగిందంటే...

విశాఖపట్నంలోని బక్కన్నపాలెంలో ఉన్న అమ్మాయి, అబ్బాయి ప్రేమించుకున్నారు. ఇంట్లో వాళ్లకి విషయం చెప్పారు. అమ్మాయి తరుపు బంధువులు పెళ్లికి ఒప్పుకోలేదు. హడావుడిగా వేరే సంబంధం చేసి పెళ్లి నిశ్చయించారు. నిశ్చితార్థం ఏర్పాటు చేశారు. శనివారం నిశ్చితార్థం జరుగుతుండగా ప్రేమించిన యువకుడు అక్కడికి వచ్చాడు. నేరుగా అమ్మాయి వద్దకి వెళ్లి ఆమెను ఎత్తుకున్నాడు. అనంతరం ముద్దు పెట్టుకున్నాడు. అది చూసి అంతా అవాక్కయ్యారు. తాను ఆ అమ్మాయిని ప్రేమిస్తున్నట్టు అందరి ముందు చెప్పాడు. ఏం చేయాలో తెలియక నిశ్చితార్థానికి వచ్చి పెళ్లికుమారుడు, అతని బంధువులు తిట్టుకుంటూ అక్కణ్నించి వెళ్లిపోయారు. అమ్మాయి తరుపు, అబ్బాయి తరుపు బంధువుల సమావేశమై వారిద్దరికి పెళ్లి చేస్తేనే మంచిదని నిర్ణయించారు.