పాటలు పాడి... నిద్ర చెడగొట్టాడని...

ఛత్తీస్ ఘడ్‌లో దారుణమైన ఘటన జరిగింది. గట్టిగా పాటలు పాడి తన నిద్ర చెడగొడుతున్నాడని సొంత అన్ననే ముక్కలు చేశాడు ఓ కర్కశ తమ్ముడు. బాలోడ్ జిల్లాకు చెందిన దౌండ్లిహోరా గ్రామంలో సురేష్ కుమార్, చింటూరామ్ అనే అన్నదమ్ములు నివసిస్తున్నారు. వారికి పెళ్లిళ్లయి పిల్లలు కూడా ఉన్నారు. వారిద్దరికి అస్సలు పడదు. తరచూ గొడవపడుతూ, కొట్టుకుంటూ ఉంటారు. కాగా మంగళవారం తమ్ముడు సురేష్ నిద్రిస్తుండగా అన్న అయిన చింటూరామ్ గట్టిగా పాటలు పాడాడు. తన నిద్ర చొడగొట్టేందుకే ఇలా పాటలు పాడుతున్నాడని భావించిన తమ్ముడు అన్నపై పడి కొట్టడం ప్రారంభించాడు. తమ్ముడిని భయపెట్టేందుకు పక్కనే ఉన్న గొడ్డలి తీశాడు చింటూరామ్.

అన్న దగ్గర్నించి బలవంతంగా ఆ గొడ్డలిని లాక్కున్న సురేష్ ఒక చేత్తొ గొడ్డలి పట్టుకుని, మరో చేత్తో అన్నను ఇంట్లోంచి బయటికి లాక్కొచ్చాడు. ఇంటికి దగ్గరల్లో ఉన్న కరెంటు స్థంభానికి అతడిని కట్టేశాడు. గ్రామస్థులు, కుటుంబసభ్యులు అడ్డుకోవడానికి వెళితే వారిపై కూడా దాడి చేయడానికి ప్రయత్నించారు. దీంతో అందరూ దూరంగా వెళ్లిపోయారు. గ్రామస్థులు, కుటుంబం చూస్తుండగానే అన్న రెండు చేతులు నరికేశాడు. తరువాత తల కూడా నరికేశాడు. అదే గొడ్డలిని పట్టుకుని వెళ్లి పోలీస్ స్టేషన్లో లొంగిపోయాడు. సురేష్ ప్రవర్తన గ్రామంలో అందరికీ తలనొప్పిగానే ఉండేది. అతనికి చాలా కోపం ఎక్కువని స్థానికులు చెబుతున్నారు. సురేష్ ను హత్యానేరంలో అరెస్టు చేశారు పోలీసులు.