చపాతీ గుండ్రంగా లేదని, గర్భవతైన భార్యను...

చపాతీలు గుండ్రంగా చేయలేదనే వంకతో గర్భవతైన భార్యను హత్య చేశాడో ప్రబుద్ధుడు. ఈ ఘటన ఉత్తర ఢిల్లీ‌లోని జహంగీర్‌పూర్‌లో చోటుచేసుకుంది. శనివారం రాత్రి జరిగిన ఈ ఘటన ఆదివారం ఉదయం వెలుగులోకి వచ్చింది. నాలుగేళ్ల పాపను గదిలో పెట్టి బంధించారని, తన సోదరి స్పృహ‌కోల్పోయి ఉందంటూ మృతురాలి సోదరుడు ఆదివారం తెల్లవారు జామున పోలీసులకు ఫిర్యాదు చేశాడు. దీంతో అక్కడకు చేరుకున్న పోలీసులు ఆమెను హుటాహుటీన వైద్యం కోసం హాస్పిటల్‌కు తరలిస్తే అప్పటికే మరణించినట్లు వైద్యులు ధ్రువీకరించారు. ఉత్తర ఢిల్లీలో జహంగీర్‌పూర్‌కు చెందిన సిమ్రన్ అనే 22 ఏళ్ల మహిళను ఆమె భర్త హతమార్చాడు. ఆమె నాలుగు నెలల గర్భవతిగా డాక్టర్లు పేర్కొన్నారు.

చపాతీలు గుండ్రంగా చేయలేదని నాన్న గొడవ పెట్టుకున్నారని, అయితే అమ్మ చాలా బాగు వండుతుందని మృతురాలి కుమార్తె పోలీసులకు తెలిపింది. అక్కడితో ఆగిపోకుండా శనివారం రాత్రి 10:30 గంటలకు మళ్లీ గొడవ మొదలవడంతో సిమ్రన్ పొట్టపై భర్త బలంగా తన్నడంతో ఆమె కుప్పకూలిపోయింది. ఆమెను కాపాడటానికి ప్రయత్నించిన పాపను కూడా ఓ గదిలో పెట్టి తాళం వేశాడు. కొద్దిసేపటి తర్వాత ఆమె గొంతు నులిమి హతమార్చాడు. వివాహానికి ముందు ఈ దంపతులు ఏడాదిపాటు సహజీవనం చేశారు. అయిదేళ్ల కిందటే వివాహం చేసుకున్నారు. వ్యాపారంలో నష్టపోవడంతో గత రెండేళ్ల నుంచి స్థానికంగా ఓ పరిశ్రమలో పనిచేస్తున్నాడు. దీనిపై కేసు నమోదు చేసిన పోలీసులు నిందితుడుని అదుపులోకి తీసుకున్నారు.